सिद्धेश म्हात्रे

मुंबई: महाराष्ट्र नवनिर्माण सेनेने 'नो टू हलाल' (Halal Meat) ही मोहीम हाती घेतल्याची बातमी कालच आली होती. इस्लामिक पद्धतीने प्राण्याची होणारी कत्तल यावर आवाज उठवत मनसेने (MNS) 'नो टू हलाल' ही मोहीम हाती घेतलेली होती. मात्र मनसेची ही मोहीम सुरू होण्याआधीच फुस्स झाली आहे. मनसेचे ज्येष्ठ नेते बाळा नांदगावकर (Bala Nandgaonkar) यांनी नो टू हलाल या मोहिमेबाबत स्पष्टपणे बोलत 'ही मनसेची अधिकृत भूमिका नाही' असं स्पष्ट केलं आहे. (MNS No to Halal Movement Failed)

हे देखील पाहा -

हलाल अर्थव्यवस्थेतून जमा होणारा पैसा दहशतवादाच्या अंमलबजावणीसाठी वापरला जात असल्याचा आरोप मनसेकडून करण्यात आला. त्यामुळे 'नो टू हलाल' या मोहिमेत सामील होण्याचे मनसेकडून आवाहनही करण्यात आले होते. मनसेचे नेते यशवंत किल्लेदार यांनी काल, शनिवारी पत्रकार परिषद घेत हा मुद्दा उपस्थित केला होता. मात्र किल्लेदार यांनी 'नो टु हलाल' मीट प्रकरणी मांडलेली भूमिका ही अधिकृत नसल्याचं मनसेचे नेते बाळा नांदगावकर यांनी स्पष्ट केलं आहे.

याप्रकरणी मनसे नेते बाळा नांदगावकर म्हणाले की, आमच्या एका कार्यकर्त्याने ती मागणी केली आहे, मात्र ती पक्षाची भूमिका नाही. 'से नो टू हलाल' ही पक्षाची भूमिका नाही. जोपर्यंत पक्षप्रमुख एखादी मागणी करत नाही तोपर्यंत ती पक्षाची भूमिका होत नाही. त्यामुळे त्याच्यावर भाष्य करणे उचित नाही. एखादा कार्यकर्ता कुठंतरी पत्र देतो आणि त्यावर आम्ही भाष्य करणे हे उचित नाही असं बाळा नांदगावकर म्हणाले, त्यामुळे मनसेची नो टू हलाल मोहीम ही सुरु होण्याआधीच फुस्स झाल्याचं बोललं जातंय.

Edited By - Akshay Baisane