''चित्रपटात मुख्य भुमिका देतो पण चौघांसोबत रात्र घालवावी लागेल'' अशी मागणी करणाऱ्या उत्तर प्रदेशातील चार जणांना मनसेने ठाण्याच्या घोडबंदर येथे चांगलाच चोप दिला आहे. एका नवोदित मराठी अभिनेत्रीकडे ही संतापजनक मागणी करण्यात आली आहे. महाराष्ट्र नवनिर्माण चित्रपट सेनेच्या कार्यकर्त्यांनी सापळा रचत सिनेस्टाईलने या चौघांचा पाठलाग करत ठाण्यातील घोडबंदर येथे एका फार्महाऊस जवळ यांना गाठले आणि चोप दिला. (MNS beats casting directors from UP for casting couch with Marathi actress)

एका नवोदित मराठी अभिनेत्रीकडे उत्तर प्रदेशच्या चौघांनी चित्रपटात काम देतो असे म्हणत शरीरसुखाची मागणी केली. तेव्हा या मुलीने ही बाब महाराष्ट्र नवनिर्माण सेनेच्या चित्रपट सेनेचे उपाध्यक्ष पद्मनाभ राणे यांना सविस्तर सांगितली. तेव्हा मनसेच्या पदाधिकाऱ्यांनी सापळा रचत त्यांचा बराच काळ गाडीतून पाठलाग केला. शेवटी योग्य संधी साधत या चौघांना ठाण्यातील घोडबंदर येथील फार्महाऊसवर रंगेहाथ गाठले आणि मनसैनिकांनी त्यांना चांगलाच चोप दिला आहे. गिरिजेश यादव, बिरालाल यादव, राहुल यादव आणि कंचन यादव अशी या चौघांची नावे असून त्यातील एक जण शिवसेनेचा पदाधिकारी असल्याची माहिती अमेय खोपकर यांनी दिली आहे. सोबतच या चौघांकडे कट्टे देखील सापडले असल्याची माहिती त्यांनी दिली आहे.

याबाबत महाराष्ट्र नवनिर्माण सेनेच्या चित्रपट सेनेचे उपाध्यक्ष पद्मनाभ राणे म्हणाले की, ही अशी माणसं उत्तर प्रदेश, बिहारमधून येतात आणि आपल्या मुलींना खराब करण्यासाठी त्यांना नको नको त्या चित्रपटांमध्ये काम देण्याचं आमिष दाखवलं जातं. मात्र या मुलीची दाद दिली पाहिजे कारण तिने यांच्याविरोधात उभं राहण्याचा निर्णय घेतला. हे असे नराधम लोकांसमोर आले पाहिजेत. आज मी आवाज नाही उठवला तर हे लोक अशा किती महिलांवर आत्याचार करतील सांगता येत नाही. तिच्या या एका आवाजासाठी आम्ही इथे एकत्र येऊन या लोकांना चोप देऊन पोलिसांच्या स्वाधिन केल्याची माहिती राणे यांनी दिली.

Edited By - Akshay Baisane