पालघर - पश्चिम रेल्वेच्या वाणगाव ते डहाणू रोड स्थानकादरम्यान अप आणि डाऊन रेल्वे मार्गावर आज मेगाब्लॉक घेण्यात येणार आहे. त्यामुळे काही रेल्वेसेवा रद्द करण्यात आल्या आहेत. तर काही सेवा अंशतः रद्द करण्यात आल्या आहेत. आज अप मार्गावर सकाळी 8:15 ते 9:15 वाजेपर्यंत 1 तासाचा मेगाब्लाँक तर डाऊन मार्गावर सकाळी 6:30 ते दुपारी 1:30 पर्यंत 8 तासांचा मेगाब्लाँक घेण्यात येणार आहे.

यादरम्यान बांद्रा जम्मूतावी स्वराज एक्सप्रेसला वाणगाव व डहाणू रोड स्थानकात थांबा दिला जाईल, बांद्रा अमृतसर पश्चिम एक्सप्रेस ला वाणगाव स्थानकात थांबा दिला जाईल. बांद्रा सुरत सुपरफास्ट इंटरसीटी, सौराष्ट्र एक्सप्रेस,सकाळी 11.30 ची विरार वलसाड शटल, बांद्रा वापी पँसेंजर, चर्चगेट डहाणू रोड, बोरीवली डहाणू रोड लोकल, डहाणू रोड बोरीवली मेमू, वापी विरार शटल, डहाणू रोड दादर लोकल, डहाणू रोड विरार लोकल रद्द करण्यात आल्या आहेत.

हे देखील पाहा -

वांद्रे गोरखपुर एक्सप्रेस वापी पर्यंतच राहील, मुंबई सेंट्रल अहमदाबाद गुजरात एक्सप्रेस मुंबई सेंट्रल ते उंबरगाव स्थानकादरम्यान रद्द करण्यात आली आहे. ती उंबरगाव स्थानकातून सुटेल. सुर्यनगरी एक्सप्रेस बांद्रा ते सुरत स्थानका दरम्यान रद्द करण्यात आली असून ती सुरत स्थानकातून सुटेल. कर्णावती एक्सप्रेस मुंबई सेंट्रल ते वापी स्थानका दरम्यान रद्द करण्यात आली असून ती वापी स्थानकातून सुटेल.

बोरीवली वलसाड मेमू ही बोरीवली ते डहाणू स्थानकादरम्यान रद्द करण्यात आली असून ती डहाणू रोड स्थानकाहून सुटेल. डोंबीवली-बोईसर मेमू ही पालघर ते बोईसर स्थानकादरम्यान रद्द असून ती पालघरला टर्मीनेट होईल. विरार डहाणू, चर्चगेट डहाणू,अंधेरी डहाणू या अप-डाऊन मार्गाच्या लोकल वाणगाव व बोईसर स्थानकापर्यंत थांबणार आहेत व तेथूनच त्या सुटतील अशी माहिती रेल्वे प्रशासनाकडून देण्यात आली.

Edited By - Shivani Tichkule