गणेश कवडे, साम टीव्ही

मुंबई : महायुती सरकराचा शपथविधी येत्या ५ डिसेंबर रोजी मुंबईतील आझाद मैदानावर होणार आहे. या शपधविधी सोहळ्यात महायुतीचे प्रमुख नेत्यांसह काही आमदार मंत्रिपदाची शपथ घेणार आहेत. या सोहळ्याकडे साऱ्यांचे लक्ष असणार आहे. या सोहळ्याला तब्बल ४० हजार जणांची उपस्थिती असणार असल्याची माहिती हाती आली आहे. नव्या सरकारचा शपथविधी कसा होणार आणि कोण कोण उपस्थित राहणार, याविषयी महत्वाची माहिती हाती आली आहे.

महायुती सरकारच्या मुख्यमंत्र्यांच्या शपथविधीच्या सोहळ्याचे महानियोजन करणे सुरु आहे. महायुती सरकारच्या शपथविधीसाठी जगभरातील प्रमुख पाहूण्यांसह जवळपास ४० हजार जणांची उपस्थिती असणार आहे. महायुती सरकारचा पंतप्रधान नरेंद्र मोदी, गृहमंत्री अमित शहा आणि सर्व केंद्रीय मंत्र्यांच्या उपस्थितीत शपथविधी पार पडणार आहे. देशातील २२ राज्यांचे मुख्यमंत्री देखील सहभागी होणार आहेत.

महायुतीला मत देणाऱ्या लाडक्या बहिणींना शपथविधीसाठी विशेष आमंत्रण देण्यात येण्यात आहे. या शपथविधी सोहळ्यासाठी दोन हजार व्हीव्हीआयपींच्या पासेसची सोय करण्यात आली आहे. १३ विशेष ब्लॉकमध्ये लोकांच्या बसण्याची व्यवस्था देखील करण्यात आली आहे. तसेच तीन स्टेजची उभारणी केली जाणार आहे.

एक मुख्य स्टेज आणि दोन त्याच्या आजूबाजूला छोट्या स्टेजची उभारणी केली जाणार आहे. विविध धर्माचे संत-महंत, भाजपशासित राज्यातील मुख्यमंत्री देखील येणार आहे. संत महंतांसाठी वेगळ्या स्टेजची उभारणी केली जाणार आहे. खासदार आणि आमदारांसाठी देखील वेगळी आसन व्यवस्था केली जाणार आहे. महायुतीच्या पदाधिकाऱ्यांची देखील आसन व्यवस्था वेगळी असणार आहे.