Maharashtra Weather Updates : गेल्या आठवडाभरापासून ढगाळ असलेले वातावरण आता निवळले आहे. ढगाळ वातावरण निवळताच उन्हाची तीव्रता वाढत चालली आहे. त्यामुळे पुण्यासह परिसरात पुढील तीन दिवस उन्हाचा चटका वाढण्याची शक्यता हवामान खात्याने वर्तवली आहे. दिवसभर आकाश निरभ्र राहिल, असा अंदाजही हवामान खात्याने वर्तवला आहे. (Latest Marathi News)

पुणे शहरातील कमाल आणि किमान तापमानात येत्या दोन ते तीन दिवसांत ३ ते ५ अंश सेल्सिअसने वाढ होण्याची शक्यता आहे. सोमवारी शहरातील कमाल तापमान ३१ अंश सेल्सिअस तर किमान तापमान १६.३ अंश सेल्सिअस नोंदविले गेले. आकाश दिवसभर अंशतः ढगाळ होते. मात्र, कोठेही पावसाची नोंद झाली नाही.

तसेच दिवसभरात उन्हाचा कडाकाही चांगलाच जाणवत होता. राज्यातही आता विविध भागात सुरू असलेल्या वादळी पावसाने उघडीप दिली आहे. दुसरीकडे मंगळवारी (ता. २१) विदर्भातील अनेक जिल्ह्यांमध्ये विजांसह अवकाळी पावसाची शक्यता कायम आहे. तर उर्वरित राज्यात मुख्यतः कोरड्या हवामानाचा अंदाज आहे. तर राज्यात उन्हाचा चटका वाढणार असल्याचे हवामान खात्याने सांगितले आहे.

राज्यात बहुतांश ठिकाणी कमाल तापमान ३१ ते ३५ अंशांच्या दरम्यान होते. तर किमान तापमानाचा पारा १२ अंशांच्या पुढे कायम आहे. दक्षिण कर्नाटकपासून मराठवाडा, पश्चिम विदर्भापर्यंत समुद्रसपाटीपासून ९०० मीटर उंचीवर हवेचा कमी दाबाचा पट्टा तमिळनाडू ते छत्तीसगड पर्यंत विस्तारला आहे.

मराठवाड्यातील शेतकऱ्यांना अवकाळीचा फटका

विदर्भ आणि मराठवाड्याला अवकाळी पावसाने झोडपल्यामुळे शेतकरी अडचणीत सापडला आहे. ऐन मार्च महिन्यात आलेल्या अवकाळीमुळे मेहनतीने कष्ट करुन पिकवलेल्या सोन्यासारख्या धान्यावर पाणी सोडावं लागतंय की काय अशी भीती निर्माण झालेय..शेतीचं होणाऱ्या अतोनात नुकसानानं शेतकरी वर्ग चिंताग्रस्त झालाय.. केवळ अवकाळी पाऊसच नाही तर मोठ्या प्रमाणात गारपिटीचा वर्षावही होत असल्यानं शेतकऱ्यांच्या चिंतेत भर पडली आहे.

Edited By - Satish Daud