विधानसभा निवडणुकीदरम्यान मुंबईतल्या जोगेश्वरीमध्ये शिवसेना शिंदे गट आणि ठाकरे गटाच्या कार्यकर्त्यांमध्ये जोरदार राडा झाल्याची घटना समोर आली आहे. जोगेश्वरीमध्ये मंगळवारी रात्री मातोश्री क्लबबाहेर दोन्ही गट आमने सामने आहे. यावेळी मारहाण, दगडफेक, घोषणाबाजी आणि तोडफोड देखील करण्यात आली. याप्रकरणी ठाकरे गटाविरोधात ३ गुन्हे दाखल करण्यात आले आहेत.

जोगेश्वरी पूर्व विधानसभा मतदारसंघामध्ये शिंदे गटाचे खासदार रवींद्र वायकर यांचे कार्यकर्ते महिलांना वस्तूंचे वाटप करत असल्याचा आरोप ठाकरे गटाने केला. त्यानंतर ठाकरे गटाचे कार्यकर्ते जाब विचारण्यासाठी मातोश्री क्लब बाहेर गेले. त्यावेळी दोन्ही गटाच्या कार्यकर्त्यांमध्ये राडा झाला आणि जोरदार घोषणाबाजी झाली. यावेळी याठिकाणी तणावाची परिस्थिती होती. या राड्याप्रकरणी आता शिवसेना ठाकरे गटाच्या कार्यकर्त्यांवर ३ वेगवेगळे गुन्हे दाखल करण्यात आले आहेत. त्यामुळे जोगेश्वरीमध्ये राजकीय वातावरण तापले आहे.