सूरज मसूरकर | मुंबई

Mumbai News :

लोकसभा निवडणुकीची येत्या काही दिवसांत घोषणा होण्याची शक्यता आहे. मात्र अद्यापही महायुती आणि महाविकास आघाडीचा जागावाटपाचा तिढा सुटताना दिसत नाही. महायुतीच्या जागावाटपासंदर्भात अमित शाह यांच्यासोबत देखील तिन्ही पक्षांच्या वरिष्ठ नेत्यांची बैठक पार पडली. मात्र काही जागांवर रस्सीखेच अद्यापही पाहिली जात आहे.

रत्नागिरी-सिंधुदुर्ग मतदारसंघातही कोण निवडणूक लढवणार याबाबत अद्यापही संभ्रम कायम आहे. रत्नागिरी-सिंधुदुर्ग लोकसभा मतदारसंघात महायुतीचा उमेदवार कोण? अशी चर्चा सुरु असताना भाजप नेते नारायण राणे आणि शिवसेना उदय सामंत यांच्यात गुप्त बैठक झाल्याची माहिती सूत्रांकडून मिळत आहे.

केंद्रीय मंत्री नारायण राणे आणि मंत्री उदय सामंत यांच्यामध्ये जुहू बंगल्यावर गुप्त बैठक झाल्याचं कळतंय. रत्नागिरी-सिंधुदुर्ग मतदारसंघातून उदय सामंत यांचे बंधू किरण सामंत निवडणूक लढण्यास इच्छूक आहे.

किरण सामंत यांचे यासाठी जोरदार प्रयत्न सुरु आहेत. तर दुसरीकडे नारायण राणे यांना या मतदारसंघातून उमेदवारी दिली जाऊ शकते, अशीही चर्चा आहे. त्यामुळे नारायण राणे की किरण सामंत? कोण या मतदारसंघातून ठाकरे गटाच्या विनायक राऊतांना टक्कर देतात, हे काही दिवसात स्पष्ट होईल.