राज्याचे उपमुख्यमंत्री अजित पवार (Deputy CM Ajit Pawar) यांनी मोठा खुलासा केला आहे. महायुतीमध्ये राष्ट्रवादी काँग्रेस अजित पवार गट सहभागी होण्यापूर्वी अजित पवार यांनी दिल्लीमध्ये केंद्रीय गृहमंत्री अमित शहा यांच्यासोबत १० बैठका केल्या होत्या. दिल्लीमध्ये पत्रकारांशी संवाद साधत असताना अजित पवार यांनी अतिशय मनमोकळेपणाने ही कबुली दिली. यावेळी त्यांनी बैठकीसाठी दिल्लीला खास पेहरावामध्ये जायचो असे देखील सांगितले. मास्क आणि टोपी घालून ते दिल्ली दौरा करत होते. अजित पवार यांच्या या वक्तव्यामुळे राजकीय वर्तुळात चर्चांना उधाण आले आहे.

अजित पवार यांनी दिल्लीत पत्रकारांशी संवाद साधताना सांगितले की, 'राष्ट्रवादी काँग्रेस महायुतीमध्ये सहभागी होण्यापूर्वी मी आणि केंद्रीय गृहमंत्री अमित शहा यांच्यामध्ये १० बैठका झाल्या होत्या. या बैठकीला जाण्यासाठी मी खास पेहराव करून दिल्लीला जायचो. मास्क आणि टोपी घालून मी या बैठकीला उपस्थिती लावायचो.' अजित पवार यांनी महायुतीमध्ये सहभागी होण्यापूर्वी काय काय झाले हे सांगितल्यानंतर आता जोरदार चर्चा होऊ लागली आहे.

अजित पवारांनी मागच्यावर्षी जुलै महिन्यामध्ये शरद पवारांची साथ सोडत महायुतीमध्ये सहभागी झाले होते. त्यांच्या या निर्णयामुळे महाराष्ट्राच्या राजकारणात मोठा राजकीय भूकंप झाला होता. अजित पवार हे राष्ट्रवादीच्या ४० आमदारांसह महायुतीमध्ये सहभागी झाले होते. अजित पवार यांनी बंडखोरी केल्यामुळे राष्ट्रवादी काँग्रेस पक्षामध्ये दोन गट पडले. एक म्हणजे शरद पवार गट आणि दुसरा म्हणजे अजित पवार गट.

यानंतर अजित पवार यांनी पक्षाचे नाव आणि चिन्हावर दावा केला. राष्ट्रवादी काँग्रेस पक्षामध्ये फूट पडल्यानंतर पहिल्यांदाच लोकसभा निवडणूक पार पडली. या निवडणुकीमध्ये शरद पवार गटाने चांगली कामगिरी केली. शरद पवार गट ७ जागांवर विजयी झाला. तर अजित पवार गटाला फक्त १ जागा मिळवण्यात यश आले होते.