भोर - पावसाने जून महिन्यात उघडी दिल्यानंतर पावसाचा (Rain) जुलै महिन्यात चांगलाच जोर वाढला आहे. गेल्या दोन दिवसापासून राज्याच्या विविध भागात जोरदार पाऊस सुरु आहे. अनेक ठिकाणी मुसळधार पाऊस झाल्यानं पूरस्थिती निर्माण झाली आहे.

मुसळधार पावसामुळे भोर-महाड मार्गावरील वरंधा घाटातील दुरुस्त केलेला रस्ता अचानक खचला. त्यामुळे भोर तालुक्याच्या हद्दीतीतील गावांकरीता जाणाऱ्या वाहनांसाठी एकेरी वाहतूक सुरु करण्यात आली आहे. भोरच्या (Bhor) हद्दीत असलेल्या उंबार्डेवाडी येथे दोन ठिकाणी रस्ता खचला आहे. वरंधा घाट परिसरात ऑरेंज अलर्ट दिल्यामुळे रायगड जिल्हाधिकाऱ्यांच्या आदेशानुसार घाटातील सर्व वाहतूक बंद करण्यात आली आहे. परंतु भोरच्या हद्दीतील गावांच्या दळणवळणासाठी छोटी वाहने रस्त्यावरून जात आहेत.

हे देखील पाहा -

गेल्या वर्षी झालेल्या अतीवृष्टीनंतर उंबार्डेवाडीजवळील रस्त्याची दुरुस्ती अतीतात्काळ करण्यात आली. मात्र यावर्षी पहिल्याच पावसात रस्त्याच्या भिंतींच्यालगतचा भराव खचला आहे. याबाबत भोरच्या सार्वजनिक बांधकाम विभागाचे उपअभियंता संजय वागज यांनी सांगितले की, रस्त्याच्या मातीचा भरावाला भेगा पडलेल्या ठिकाणच्या रस्त्याची काम करण्यास सुरुवात झाली आहे. तसेच खचलेल्या रस्त्याच्या ठिकाणी एकेरी वाहतूक सुरु केली आहे.

रस्त्याच्या कामासाठी घाटात २४ तास पथक कार्यरत करण्यात आले आहे. मुसळधार पावसामुळे दळणवळणाची अडचण होऊ नये यासाठी जेसीबी आणि इतर आवश्यक साधनसामुग्रीसह सार्वजनिक बांधकाम विभागाचे एक पथक घाटात २४ तास तैनात करण्यात आले आहे अशी माहिती भोरच्या सार्वजनिक बांधकाम विभागाचे उपअभियंता संजय वागज यांनी दिली.