राज्यात विधानसभा निवडणूक कधी जाहीर होणार, असा प्रश्न अनेकांना पडला आहे. यातच आज रात्री उशिरा केंद्रीय निवडणूक आयोगाची टीम महाराष्ट्रात दाखल झाली आहे. आगामी विधानसभा निवडणुकीच्या तयारीसाठी केंद्रीय निवडणूक आयोगाची टीम मुंबईत दाखल झाली आहे.

मुख्य निवडणूक आयुक्त राजीव कुमार, सहआयुक्त ज्ञानेश कुमार आणि एस एस संधू यांच्यासोबत इतर अधिकारी मुंबईत दाखल झाले आहेत. शुक्रवारी केंद्रीय निवडणूक आयोगाची टीम राजकीय पक्षांच्या प्रमुख पदाधिकाऱ्यांशी चर्चा करणार आहे.

सोबतच इतर अधिकाऱ्यांशी चर्चा केल्यानंतर शनिवारी निवडणूक आयोगाची पत्रकार परिषद होऊ शकते. याच पत्रकार परिषदेत राज्य विधानसभा निवडणुकीची घोषणा होऊ शकते, असं सूत्रांचं म्हणणं आहे.

मिळालेल्या माहितीनुसार, केंद्रीय निवडणूक आयोगाची २७ आणि २८ सप्टेंबर असे दोन दिवस महाराष्ट्राच्या दौऱ्यावर आहेत. यावेळी राज्यातील २८८ विधानसभा मतदारसंघाचा आढावा घेण्यात येणार आहे. यासोबतच राज्यातील प्रमुख पक्षांच्या नेत्यांची भेट घेऊन चर्चा केली जाणार आहे. राज्यात निवडणुका निःपक्षपाती पार पाडाव्यात यासाठी राज्य निवडणूक आयोगाने तयारी पूर्ण केली, असल्याची माहितीही सूत्रांनी दिली आहे.

दरम्यान, राज्यात २६ नोव्हेंबर २०२४ रोजी विधानसभेची मुदत पूर्ण होत आहे. या मुदतीआधी राज्यात विधानसभा निवडणूक झाली पाहिजे, हे लक्षात घेऊन निवडणूक आयोग कामाला लागलं आहे. यातच शनिवारी पत्रकार परिषदेत निवडणूक आयोगाकडून राज्यात निवडणुकीच्या तारखेची घोषणा होणार का, याची उत्सुकता अनेकांना आहे.