पुण्यात रविवारी सकाळी औंध भागातल्या सिंध सोसायटी मध्ये बिबट्याचे दर्शन झाले. या ठिकाणी असलेल्या सीसीटिव्ही मध्ये बिबट्या कैद झाला. याची माहिती मिळताच वन विभागाचं पथक आणि RESQ टीम औंधमध्ये दाखल झाली. मात्र शोध घेऊनही बिबट्या सोमवारपर्यंत कुठेच दिसून आला नाही.

गेल्या काही दिवसांपासून पुणे जिल्ह्याच्या ग्रामीण भागात बिबट्यांनी अक्षरशः धुमाकूळ घातलाय. शिरूर मध्ये एका मुलाचा बिबट्याने जीव घेतल्याची घटना ताजी आहे.ग्रामीण भागात रात्रीच्या वेळी बिबट्याकडून होणारे हल्ले थांबण्यासाठी प्रशासनाकडून हालचाली सुरू असतानाच आता बिबट्याची थेट पुणे शहरात एन्ट्री झाल्याने भीतीचे वातावरण आहे.

याआधी पुण्यात कधी दिसला होता बिबट्या ते पाहूया

पुणे आंतरराष्ट्रीय विमानतळ परिसरात 19 नोव्हेंबर रोजी दोनदा बिबट्या आढळला होता.

फेब्रुवारी मध्ये निगडीमध्ये बिबट्या दिसला होता. वनविभागाच्या मदतीने त्याला पकडण्यात आले होते.

14 नोव्हेंबरला शेवाळीवाडी परिसरात बिबट्या दिसला. त्यानंतर फुरसुंगी परिसरातही बिबट्या दिसल्याचा व्हिडीओ व्हायरल झाला होता.

पुणे शहरातील औंध सारख्या दाट वस्तीच्या भागात बिबट्या आल्याने स्थानिकांमध्ये चिंता वाढली आहे. वन विभागाने सतर्क राहण्याचे आवाहन केलं आहे. मात्र मानवी वस्तीमध्ये बिबट्याचा वावर वाढत चालल्याने याला जबाबदार कोण आहे? हा प्रश्न महत्वाचा आहे.