कुर्ल्यामध्ये सोमवारी रात्री भरधाव बेस्ट बसने अनेक वाहनांना चिरडल्याची धक्कदायक घटना घडली होती. या अपघातामध्ये आतापर्यंत ७ जणांचा मृत्यू आणि ४९ जण जखमी झाले आहेत. या अपघातानंतर संतप्त झालेल्या नागरिकांनी बसच्या चालकाला बेदम मारहाण केली. या मारहाणीचा व्हिडीओ समोर आला आहे. या अपघातानंतर चालक संजय मोरे (५४ वर्षे) याला पोलिसांनी अटक केली असून त्याच्याविरोधात सदोष मनुष्यवधाचा गुन्हा दाखल करण्यात आला आहे. संजय मोरेने पोलिस चौकशीदरम्यान धक्कादायक माहिती दिली.

कुर्ला बेस्ट बस अपघातानंतर चालकाने बसमध्ये तांत्रिक बिघाड झाल्याचे सांगितले होते. तसंच, बसचा वेग आपोआप वाढू लागला आणि ब्रेक फेल झाल्याचा त्याने दावा केला होता. पण तपासातून धक्कादायक माहिती उघड झाली. मात्र संजय मोरे हा १ डिसेंबर रोजी कंत्राटपदावर रुजू झाला होता. तो आधी खासगी वाहनं चालवत होता. त्याला मोठ्या बस चालवण्याचा कोणताही अनुभव नव्हता. अपघाताच्या दिवशी पहिल्यांदाच त्याने बेस्ट बस चालवली होती.