मुंबई : हापूस प्रेमींसाठी एक आनंदाची बातमी आहे. 'कोकणचा राजा' समजल्या जाणाऱ्या रत्नागिरी हापूस आंब्याची पहिली पेटी मुंबईत (Mumbai) दाखल झाली आहे. मुंबईतील कृषी उत्पन्न बाजार समितीमध्ये ही पेटी दाखल झाली आहे. फळ व्यापारी विजय ढोले यांच्या निवृत्ती नानाजी ढोले अँड सन्समध्ये यंदाच्या हंगामातील पहिल्या आंब्याच्या दोन पेट्या दाखल झाल्या आहेत. (Latest Marathi News)

देवगड तालुक्यातील पुरळ कोठड गावातील शेतकरी वसंत गावकर यांच्या शेतातील हा आंबा आहे. गावकर यांच्या आंबा बागेतील झाडाला पावसाळ्यातच मोहर आला होता. याची त्यांनी चांगली काळजी घेतली. यामुळे थंडीतच झाडाला आंबा आला आहे. त्यांच्या हा आंबा पेटीला चांगली बोली लागणार आहे. हंगामातील ही पहिली पेटी हजारोंच्या किंमतीत विकली जाणार आहे.

मागील दोन ते तीन वर्षांपासून कोरोनाच्या पार्श्वभूमीवर फळांचा राजा आंबा हा म्हणावं तितकं बाजारात आला नसल्याने नागरिकांना एकतर कमी प्रमाणात आणि जास्त दर घेऊन आंबा खरेदी करावा लागला. पण यंदा हंगामाच्या आधीच आंबा हा बाजारात दाखल झाला आहे. यंदा अपेक्षेप्रमाणे जास्तच आंब्याची आवक होणार आहे आणि यंदा मोठ्या प्रमाणात आंब्याला मागणी आहे, अशी माहिती यावेळी फळ व्यापारी विजय ढोले यांनी दिली.

Edited By - Satish Daud