Bollywood News:

मनोरंजन विश्वातून फसवणुकीची एक मोठी बातमी समोर आली आहे. अभिनेत्री करिष्मा तन्नाचा पती वरूण बंगेरा आणि अभिनेता समीर कोचर यांना तब्बल एक कोटी रुपयांचा गंडा घालण्यात आला आहे. मुंबईतील (Mumbai) घर खरेदीवरून त्यांची फसवणूक झालीये. आपली फसवणूक झाल्याचे समजताच त्यांनी रिअल इस्टेट डेव्हलपमेंट फर्मच्या मालकांविरोधात तक्रार दाखल केली आहे.  ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

मिळालेल्या अधिक माहितीनुसार, प्रनीत प्रेम नाथ आणि त्यांच्या पत्नी अमिषा अशी आरोपींची नावे आहेत. या दोघांनी करिष्मा आणि समीर यांच्याकडून फ्लॅट (Home) विकण्याच्या नावाखाली १.०३ कोटी रुपये घेतले, असा आरोप करण्यात आला आहे. साल २०२२ मध्ये आरोपी व्यक्तीने अभिनेत्री करिष्मा तन्नाचा पती वरूण बंगेरा आणि अभिनेता समीर कोचर यांच्याकडे पैशांची मागणी केली होती.

मला पैशांची फार गरज आहे. त्यामुळे मी माझे दोन फ्लॅट विकतोय असं आरोपीने सांगितलं होतं. पुढे ठरल्याप्रमाणे करार करण्यात आला. आरोपीने करिष्मा आणि समीर या दोघांकडूनही अॅडवान्स रक्कम घेतली. ही रक्कम घेतल्यावर त्याची कागदपत्रेही तयार करण्यात आली. मात्र प्रत्यक्षात आरोपीने फ्लॅट दुसऱ्याच व्यक्तीला विकल्याचा आरोप कलाकारांनी केला आहे.

आपली फसवणूक झाल्याचं लक्षात येताच अभिनेत्री करिष्मा तन्नाचा पती वरूण बंगेरा आणि अभिनेता समीर कोचर यांनी पोलीस ठाण्यात धाव घेतली. दाखल तक्रारीनुसार पोलिसांनी आरोपी पती-पत्नीविरुद्ध भादंवि कलम ४०९, ४२० अन्वये गुन्हा दाखल केला असून तपास सुरू केला आहे.