कल्याणच्या एपीएमसी मार्केटमधून एक धक्कादायक बातमी समोर येत आहे. २० वर्षीय तरूणाने पती, पत्नी आणि त्यांच्या मुलावर कैचीने सपासप वार केले आहे. या हल्ल्यात पतीचा जागीच मृत्यू झाला असून, मुलगा गंभीर जखमी झाला आहे, तर पत्नीला किरकोळ दुखापत झाली आहे. या घटनेनंतर बाजारपेठ पोलीस घटनास्थळी दाखल झाले असून, त्यांनी आरोपीला अटक केली आहे.

कल्याणच्या एपीएमसी मार्केटमध्ये भरदिवसा घडलेल्या धक्कादायक घटनेने परिसरात एकच खळबळ उडाली आहे. चिराग सोनी या २० वर्षीय आरोपीने किरकोळ वादातून एका कुटुंबावर कैचीने हल्ला केला. या कैची हल्ल्यात चमनलाल कार यांचा जागीच मृत्यू झाला असून, त्यांचा मुलगा कार्तिक आणि मृत व्यक्तीची पत्नी सध्या कल्याणमधील एका खाजगी रुग्णालयात उपचार घेत आहे.

चमनलाल कारला आणि चिराग सोनी दोघेही एपीएमसी मार्केटमध्ये शेजारी शेजारी केळीची पाने विकण्याचा व्यवसाय करत होते. आज सकाळी विक्रीसाठी आणलेली केळीच्या पानांची बंडल अदलाबदल झाल्याने दोघांमध्ये वाद झाला. वाद विकोपाला गेला. या वादातून चिरागने अचानक चमनलाल कारला आणि त्यांच्या कुटुंबावर कैचीने हल्ला केला.

हल्ला केल्यानंतर या परिसरात एकच खळबळ उडाली. बाजारपेठ पोलीस तातडीने एपीएमसी मार्केट परिसरात दाखल झाले. त्यांनी हल्ला झालेल्या कुटुंबाला रूग्णालयात नेले. तसेच आरोपीला अटक केली. या प्रकरणी पुढील तपास पोलिसांकडून सुरू आहे. या घटनेनंतर परिसरात एकच खळबळ उडाली आहे.