कल्याण : वसई येथे राहणारी जया पिसे नावाची महिला प्रवासी तिच्या मुलीसोबत काकीनाडा भावनगर एक्सप्रेसमधून  प्रवास करीत होती. 27 जानेवारी रोजी सदर महिला सोलापूर येथून रेल्वेत बसल्यानंतर गाडी कर्जत स्थानकाजवळ आली असता बोगीत काही प्रवाशांनी चोर चोर असा आरडाओरडा सुरु केला. प्रवाशांचा आवाज ऐकून जया यांनी त्यांची बॅग आपल्या जवळ सुरक्षितपणे घेऊन बसल्या. याच दरम्यान चार ते पाच जण त्यांच्या जवळ आले. वस्तूने भरलेली बॅग हिसकावून घेण्याचा प्रयत्न केला. जयाने त्यांना प्रतिकार केला.

हे देखील पहा :

एकाने चाकूचा धाक दाखवीत तिच्याकडील बॅग हिसकावून घेतली. याच दरम्यान एक सतर्क नागरीकाने 100 नंबरवरुन पोलिसांना फोन केला. नियंत्रण कक्षातून कल्याण जीआरपी आणि आरपीएफला माहिती दिली गेली. या ट्रेनमध्ये कर्तव्यावर असलेल्या आरपीएफ जवानाने त्वरीत या पाच जणांना ताब्यात घेतले. त्यानंतर त्यांना कल्याण जीआरपीच्या हवाली केले.  याबाबत कल्याण जीआरपीच्या महिला पोलिस निरिक्षक अर्चना दुसाणे यांनी सांगितले की हे पाचही आरोपी पुण्याच्या कोंढवा परिसरात राहणारे आहेत.

तबरेज शेख, दानिश खान, अजय दबडे, निजान शेख अशी या आरोपींची नावे असून यात एका 14 वर्षीय अल्पवयीन आरोपीचा देखील समावेश आहे. कल्याण रेल्वे कोर्टात या चार जणांना हजर केले असता चारही आरोपींना पाच दिवसांची पोलिस कोठडी सुनावण्यात आली आहे. या आरोपींनी अशा प्रकारचा गुन्हा यापूर्वी केला आहे का याचा तपास पोलिस करीत आहेत.

Edited By : Krushnarav Sathe