>> अभिजीत देशमुख

कल्याण : कल्याण पश्चिममधील आधारवाडी येथील रौनक सिटी कॉम्प्लेक्समधील एका इमारतीतील फ्लॅटला भीषण आग लागली आहे. इमारतीच्या १४ व्या मजल्यावरील फ्लॅटला ही आग लागली आहे. घटनेची माहिती मिळताच अग्निशमन दलाच्या गाड्या घटनास्थळी दाखल झाल्या.

आग कशामुळे लागली याबाबत कोणतंही कारण अद्याप समोर आलेलं नाही. या आगीत एक महिला जखमी झाल्याची प्राथमिक माहिती समोर येत आहे.

मिळालेल्या महितीनुसार, इमारतीच्या या फ्लॅटमध्ये एक ६२ वर्षीय महिला स्वयंपाक बनवत होता. मात्र अचानक तिच्या कपड्याने पेट घेतला. आरडा ओरड झाल्याने आजूबाजूच्या रहिवाशांनी धाव घेत आग विझवत महिलेला उपचारासाठी रुग्णालयात दाखल केलं.

मात्र आग पूर्णपणे विझली नव्हती. त्यामुळे बंद दरवाजादाड आगीने पुन्हा रौद्र रूप धारण केले.आगीची माहिती मिळताच अग्निशमन दलाच्या गाड्या घटनास्थळी दाखल झाल्या. तासाभराच्या प्रयत्नानंतर आगीवर नियंत्रण अग्निशमन जवानांना यश आलं आहे.