संघर्ष गांगुर्डे, कल्याण

कल्याण-मुरबाड मार्गावर रायता पुलाजवळ झालेल्या भीषण अपघातात एका व्यक्तीचा मृत्यू झाला असून अन्य तीन जण गंभीर जखमी झाले आहेत. चारचाकी गाडीने रस्त्याच्या बाजूला उभ्या असलेल्या कंटेनरला जोरदार धडक दिल्याने हा अपघात झाला. या घटनेमुळे परिसरात काही काळ गोंधळाचे वातावरण निर्माण झाले होते.

मिळालेल्या माहितीनुसार, चारचाकी गाडीमधून काही प्रवासी पुण्याहून मुंबईच्या दिशेने प्रवास करत होते. मुरबाडकडून कल्याणच्या दिशेने येत असताना रायता पुलाजवळ चालकाचा गाडीवरील ताबा सुटला. पुलाचा अंदाज न आल्याने गाडी थेट सर्व्हिस रोडवर उतरली. याच रस्त्यावर असलेल्या कंटेनरला चारचाकीने जोरदार धडक दिली.

ही धडक इतकी जोरात होती की चारचाकीचे मोठे नुकसान झाले. गाडीतील राज बहादूर अमरदेव जयस्वाल यांचा या अपघातात जागीच मृत्यू झाला. तर गाडीमधील अन्य तीन प्रवासी गंभीर जखमी झाले. अपघातानंतर घटनास्थळी नागरिकांनी गर्दी केली. जखमींना तातडीने रुग्णालयात उपचारासाठी दाखल करण्यात आले.

घटनेची माहिती मिळताच टिटवाळा पोलिसांनी तातडीने घटनास्थळी धाव घेतली. पोलिसांनी अपघाताची पाहणी करून पुढील तपास सुरू केला आहे. चालकाचे वाहनावरील नियंत्रण नेमके कोणत्या कारणामुळे सुटले, तसेच अपघातामागे इतर काही कारण आहे का, याचा शोध पोलीस घेत आहेत. कल्याण-मुरबाड मार्गावर झालेल्या या अपघातामुळे पुन्हा एकदा रस्ते सुरक्षेचा प्रश्न समोर आला आहे. वाहन चालवताना वेगावर नियंत्रण ठेवणे आणि रस्त्यावरील परिस्थितीचा अंदाज घेणे किती महत्त्वाचे आहे, हे या घटनेतून स्पष्ट झाले आहे.