अभिजीत देशमुख

Kalyan Crime News: कल्याण पूर्व खडेगोळवली परिसरात काल जुन्या वादातून दहा ते बारा जणांच्या टोळक्याने केलेल्या मारहाणीत एका अल्पवयीन मुलाचा मृत्यू झाला. या मुलाच्या विरोधात याआधी देखील अनेक गुन्हे दाखल असल्याची माहिती पोलिसांनी दिली. या मारहाण करणाऱ्या चार जणांना कोळशेवाडी पोलिसांनी ताब्यात घेतले आहे. तसेच या प्रकरणाचा तपास सुरू केला आहे. (Latest Marathi News)

कल्याण पूर्वेतील कोळसेवाडी परिसरात शुक्रवारी संध्याकाळी समीर लोखंडे नावाच्या विधिसंघर्षित अल्पवयीन मुलाला काही तरुण अपहरण करुन घेऊन गेले. त्याला बेदम मारहाण करण्यात आली. उपचारासाठी त्याला रुग्णालयात दाखल करण्यात आले.

मात्र, उपचारादरम्यान त्याचा मृत्यू झाला. या प्रकरणी कोळसेवाडी पोलिसांनी चार जणांना ताब्यात घेतले आहे. ज्यामध्ये दोन अल्पवयीन आहेत. तर मुकेश उर्फ विठ्ठल काण्या आणि निरज दास अशी दोन आरोपीची नावे आहेत.

तसेच केडीएमसीचे भाजपचे माजी उपमहापौर विक्की तरे यांच्या निकटवर्तीयाला देखील चौकशीसाठी ताब्यात घेतले आहे. घटनेच्या वेळी तो कोळसेवाडी पोलिस ठाण्यात होता. मात्र, मयत तरुणाने त्याचे फिर्यादीत नाव घेतल्याने त्याचीही चौकशी पोलिसांकडून सुरु आहे, असे पोलिसांनी सांगितले आहे.

या मारहाणीत त्याचा मृत्यू झाला त्या समीर विरोधात यापूर्वी अनेक प्रकारचे गुन्हे दाखल आहे. तो विधीसंघर्षित बालक असल्याने तो जेलमधून बाहेर होता.

हत्या का घडली?

तत्पूर्वी, सध्या कल्याण पूर्वेत गुन्हेगारीचा अड्डा झाला आहे. कल्याण पूर्वेत अभिजीत कुडळकर आणि विशाल उर्फ दही हे दोघे गँग चालवित असल्याची माहिती आहे.

दोघांच्या विरोधात कोळसेवाडी पोलिसांनी कारवाई केली आहे. दोघे जेल मध्ये आहेत. मात्र त्यांच्या हस्तकांमध्ये संघर्ष सुरु असून या दोघांना राजकीय पाठबळ असल्याचे बोलले जातेय. त्यातून हत्येची घटना घडल्याचे सांगितले जात आहे.