पुणे - दीडशेहून अधिक सीसीटीव्ही फुटेज तपासून विश्रांतवाडी पोलिसांनी २ सराईत सोनसाखळी चोरांना जेरबंद केले आहे. चोरीचे सोने विकत घेणाऱ्या सोनाराला देखील या प्रकरणी अटक करण्यात आली आहे. या गुन्ह्यात अशोक गंगावणे व अनिल रघुनाथ बिरदवडे या दोन सोनसाखळी चोरांसह गुन्ह्यातील सोने खरेदी करणारा सोनार आकाश सोनार याला देखील अटक करण्यात आली आहे.

विश्रांतवाडी पोलिसांनी दिलेल्या माहितीनुसार, 2 नोव्हेंबर रोजी विश्रांतवाडी कळस येथील विशाल परिसर या ठिकाणी हबिबा शेख घराच्या बाहेरील बाकावर बसलेले असताना काळ्या रंगाच्या दुचाकीवरील दोन अज्ञात इसमांनी येऊन त्यांच्या गळ्यातील सोन्याची चैन जबरदस्तीने हिसका मारून पळून गेले. याप्रकरणी विश्रांतवाडी पोलिसांनी अज्ञात आरोपी विरोधात सोनसाखळी चोरीचा गुन्हा दाखल केला होता. या गुन्ह्याचा तपास करत असताना विश्रांतवाडी पोलीस स्टेशनचे पोलीस कर्मचारी प्रफुल मोरे, शेखर खराडे ,संदीप देवकते यांनी कळस येथून बारामती पर्यंत अंदाजे दीडशे ते दोनशे सीसीटीव्ही कॅमेरे तपासणी केल्यानंतर या गंभीर गुन्ह्यातील आरोपींचा शोध लागला.

सदरचे आरोपी बारामती येथील 29 फाटा याठिकाणी येणार असल्याची खात्रीशीर माहिती पोलीस हवालदार दिपक चव्हाण व शिपाई संदिप देवकाते यांना गोपनीय बातमीदाराकडून मिळाली होती.त्यानुसार विश्रांतवाडी पोलिसांनी सापळा रचून आरोपींना ताब्यात घेतले. त्यांच्याकडून गुन्ह्यातील तीन तोळे वजनाचे सोनसाखळी हस्तगत करण्यात विश्रांतवाडी पोलिसांना यश आले.

Edited By - Shivani Tichkule