मुंबई: राज्यात गेल्या काही दिवसापासून राजकीय संघर्ष सुरू आहे. शिवसेनेतील (ShivSena) ज्येष्ठ नेते एकनाथ शिंदे यांनी ४० आमदारांसह बंड पुकारले आहे, त्यामुळे आता महाविकास आघाडी सरकार अडचणीत आले आहे. शिवसेनेने १५ आमदारांविरोधात कारवाई करण्यास सुरूवात केली आहे. एकनाथ शिंदे गटाच्या १५ आमदारांनी आता सुप्रीम कोर्टात धाव घेतली आहे. या संदर्भात आज सुप्रीम कोर्टात (Supreme Court) सुनावणी होणार आहे.

सुप्रीम कोर्टात (Supreme Court) आज जस्टीस सूर्यकांत आणि जस्टीस पारडीवाला यांच्या बेंच समोर सुनावणी होणार आहे. या प्रकरणाच्या सुनावणीत उपसभापती, राज्य विधानसभेचे सचिव, महाराष्ट्र सरकार, शिवसेनेचे उपनेते अजय चौधरी, शिवसेनेचे सुनील प्रभू आदींचा समावेश आहे. तसेच बंडखोरी केलेल्या आमदारांच्याकडून ज्येष्ठ वकील हरीश साळवे बाजू मांडणार आहेत. तसेच शिवसनेकडून ज्येष्ठ वकील अभिषेक मनु सिंघवी युक्तिवाद करणार आहेत.

शिवसेनेचे बंडखोर आमदार भरत गोगावले, प्रकाश राजाराम सुर्वे, तानाजी जयवंत सावंत, महेश संभाजीराजे शिंदे, अब्दुल सत्तार, संदीपान भुमरे, संजय सिरसाट, यामिनी यशवंत जाधव, अनिल बाबर, लतबाई चंद्रकांत सोनवणे, रामदास सोनवणे, रोवळे पाटील, संजय बोरकर, संजय पाटील, बालाजी देविदासराव कल्याणकर आणि बालाजी प्रल्हाद किनीलकर यांनी याचिका दाखल केली आहे.

एकनाथ शिंदे यांचे नवे ट्विट

शिवसेनेचे नेते आणि मंत्री एकनाथ शिंदे यांनी त्यांच्या जवळपास ५० समर्थक आमदारांसह बंडाचे निशाण फडकवले आहे. त्यामुळे एकनाथ शिंदे (Eknath Shinde) गट आणि ठाकरे सरकारमध्ये जोरदार सत्तासंघर्ष सुरु आहे. याच पार्श्वभूमीवर एकनाथ शिंदे यांनी खळबळ माजवणारं ट्विट केलं आहे. मुंबई बाँबस्फोट घडवून निष्पाप मुंबईकरांचा जीव घेणाऱ्या दाऊदशी थेट संबंध असणाऱ्यांना हिंदूहृदयसम्राट वंदनीय बाळासाहेब ठाकरे यांची शिवसेना समर्थन कशी करू शकते…? यालाच विरोध म्हणून उचललेलं हे पाऊल;आम्हा सर्वांना मृत्यूच्या दारात घेऊन गेले तरी बेहत्तर..असं शिंदे यांनी ट्विटमध्ये म्हटलं आहे.