बदलापूर : बदलापुरातील नामांकित शाळेत चिमुकल्या मुलींवरील अत्याचारानंतर बदलापूरकरांचा रस्त्यावर आक्रोश पाहायला मिळाला. बदलापूरकरांनी मागील दोन तासांपासून रेल्वेसेवा रोखून ठेवली आहे. रेल्वे रुळावर उतरत आंदोलकांनी आरोपीला फाशीचा शिक्षा देण्याची मागणी केली आहे. आंदोलकांकडून शहरातील पूर्व आणि पश्चिम दिशेला जोडणारा उड्डाणपूल देखील बंद करण्यात आला आहे. बदलापुरातील अत्याचार प्रकरण फास्टट्रॅक कोर्टात चालणार आहे. या प्रकरणाचा प्रस्ताव आजच फास्ट ट्रॅक कोर्टात सादर करण्यात येणार असल्याची माहिती गृहमंत्री देवेंद्र फडणवीस यांनी दिली आहे.

बदलापुरातील दोन चिमुकल्यांवरील अत्याचारानंतर नागरिकांचा उद्रेक पाहायला मिळत आहे. संतप्त नागरिकांनी अत्याचार घडलेल्या शाळेची तोडफोड केली आहे. शाळेच्या प्रवेशद्वारातून आत शिरून जमावाने शाळेची तोडफोड केली आहे. मागील दोन तासांपासून आंदोलकांनी रेल्वे रोखून धरल्याने मध्य रेल्वे सेवेवर मोठा परिणाम झाला आहे. यामुळे कल्याणकडून कर्जतकडे जाणारी रेल्वे ठप्प झाली आहे. या संपूर्ण प्रकरणावर गृहमंत्री देवेंद्र फडणवीस यांनी देखील प्रतिक्रिया दिली आहे.

गृहमंत्री देवेंद्र फडणवीस म्हणाले,'बदलापुरातील दुर्दैवी घटनेत २ तासांत आरोपीला अटक करण्यात आली आहे. या प्रकरणात संस्थेची सुद्धा चौकशी करण्यासाठी पोलिसांना सांगण्यात आलं आहे. या प्रकरणातील दोषींवर कठोर कारवाई करण्याचेही आदेश देण्यात आले आहेत. फास्टट्रॅक कोर्टात हा गुन्हा चालविण्यासाठी आजच प्रस्ताव सादर करण्याचे आदेश ठाणे पोलिस आयुक्तांना देण्यात आले आहेत'.

फास्टट्रॅक कोर्टात चालणार खटला : मुख्यमंत्री शिंदे

बदलापुरातील चिमुकल्या मुलींवरील अत्याचार प्रकरणावर मुख्यमंत्री एकनाथ शिंदे यांनी प्रतिक्रिया दिली. या प्रकरणाचा फास्टट्रॅक कोर्टात खटला चालणार आहे, अशी प्रतिक्रिया मुख्यमंत्री एकनाथ शिंदे यांनी दिली आहे.

मुख्यमंत्री शिंदे काय म्हणाले?

या प्रकरणावर बोलताना मुख्यमंत्री शिंदे म्हणाले, 'या घटनेनंतर मी पोलीस अधिकाऱ्यांशी चर्चा केली असून या प्रकरणातील आरोपीला अटक केली आहे. या प्रकरणातील आरोपीविरोधात कठोरातील कठोर कारवाई केली पाहिजे. फास्टट्रॅक कोर्टात हा खटला चालवला पाहिजे. त्यामुळे कोणालाही यासारखं घाणरेडं कृत्य कोणी करणार नाही. या शाळेतील कर्मचारी असतील. त्यांची संपूर्ण पार्श्वभूमी तपासून कामावर घेतले पाहिजे. या प्रकरणानंतर संस्था चालकांवर कारवाई करण्याच्या सूचना दिल्या आहेत. या प्रकरणी कोणालाही सोडता येणार नाही. फास्टट्रॅक कोर्टात खटला चालवणार आहेत. या प्रकरणी तात्काळ कारवाई करण्याच्या सूचना दिल्या आहेत'.