>> अजय दुधाणे

कल्याण : अंबरनाथमध्ये लोकलमधून पडून एक १७ वर्षीय कॉलेज तरुणी जखमी झाली. मात्र त्यानंतर ॲम्बुलन्स वेळेत न आल्यामुळे ही तरुणी जखमी अवस्थेत तब्बल ४० मिनिटं प्लॅटफॉर्मवरच पडून होती.

अंबरनाथ रेल्वे स्थानकाजवळ गुरुवारी संध्याकाळी एक तरुणी लोकलमधून पडली. दिव्या संजय जाधव असं या १७ वर्षीय कॉलेज तरुणीचं नाव असून ती कॉलेजहुन घरी परतत असताना हा अपघात घडला. (Latest Marathi News)

यानंतर रेल्वे पोलिसांनी तिला उचलून अंबरनाथ रेल्वे स्थानकात आणलं. मात्र तिथे आल्यानंतर तिला रुग्णालयात पाठवण्यासाठी ॲम्बुलन्सच वेळेत आली नाही. त्यामुळे जखमी अवस्थेत ही तरुणी तब्बल ४० मिनिटं अंबरनाथ रेल्वे स्थानकात पडून होती.

अखेर ॲम्बुलन्स आल्यानंतर तिला आधी उल्हासनगरच्या शासकीय मध्यवर्ती रुग्णालयात आणि तिथून कळव्याच्या छत्रपती शिवाजी महाराज रुग्णालयात उपचारांसाठी हलवण्यात आलं. या घटनेमुळे रेल्वे अपघातातील जखमींना योग्य वेळेत मदत मिळत नसल्याची बाब पुन्हा एकदा समोर आली आहे.