दिवाळीच्या सणात राज्यभरात आगीच्या घटनांमध्ये वाढ होताना दिसत आहे. अशातच आता मंत्री गणेश नाईक यांच्या पावन गड येथील शासकीय बंगल्याला आग लागल्याची घटना समोर आली आहे. या घटनेमुळे परिसरात एकच खळबळ उडाली आहे.

मिळालेल्या माहितीनुसार, बंगल्यातील एसीमध्ये शॉर्ट सर्किट झाल्यामुळे ही आग लागल्याचा प्राथमिक अंदाज व्यक्त केला जात आहे. आग लागल्याची माहिती मिळताच अग्निशमन दलाच्या गाड्या घटनास्थळी दाखल झाल्या. आग विझवण्यासाठी अग्निशमन दलाच्या जवानांकडून शर्थीचे प्रयत्न सुरू आहेत. काही वेळातच आग आटोक्यात येण्याची शक्यता व्यक्त केली जात आहे.

मात्र, आगीमुळे बंगल्याचे किती नुकसान झाले आहे, याबाबत अद्याप स्पष्ट माहिती समोर आलेली नाही. दरम्यान, ही आग नेमकी कशामुळे लागली, याचा तपास सुरू आहे. एसीमधील शॉर्ट सर्किट हेच आगीचे कारण आहे का, याचीही चौकशी केली जाणार आहे. या घटनेबाबत अधिक माहिती मिळण्याची प्रतीक्षा आहे.