अभिजीत देशमुख, कल्याण|ता. २१ ऑगस्ट २०२४

बदलापूरमधील अल्पवयीन मुलींवरील अत्याचार प्रकरणात मोठी अपडेट समोर आली आहे. या प्रकरणातील मुख्य आरोपी अक्षय शिंदे याला 26 तारखेपर्यंत कल्याण न्यायालयाने पोलीस कोठडी सुनावली आहे. आज कल्याण न्यायालयामध्ये आरोपीला हजर करण्यात आले होते. यावेळी आरोपीने अशा प्रकारचे अजून काही लैंगिक शोषण व कृत्य केल्याचा संशय व्यक्त करत पोलिसांनी पोलीस कोठडी वाढवण्याची मागणी केली होती. त्यानंतर न्यायालयाने त्याची पोलीस कोठडीत रवानगी केली आहे.

बदलापूर प्रकरणात मोठी अपडेट

बदलापूरमध्ये दोन अल्पवयीन मुलींवर शाळेमधील शिपाई कर्मचाऱ्याने अत्याचार केल्याची घटना उघडकीस आली होती. या भयंकर घटनेने राज्यभरात संतापाची लाट उसळली आहे. या प्रकरणातील मुख्य आरोपी अक्षय शिंदे (वय, २४) याला पोलिसांनी अटक केली होती. आज त्याला कल्याण न्यायालयामध्ये हजर करण्यात आले. यावेळी झालेल्या सुनावणीनंतर कोर्टाने आरोपीला २६ तारखेपर्यंत पोलीस कोठडी सुनावली आहे.

नराधम आरोपीला पोलीस कोठडी

आरोपीने अशा प्रकारचे अजून काही लैंगिक शोषण व कृत्य केल्याचा संशय व्यक्त करत पोलिसांनी पोलीस कोठडी वाढवण्याची मागणी केली होती. मुलींना आरोपी काय बोलायचा? कसा न्यायचा आणि त्यांच्यावर अत्याचार करायचा या संदर्भात चौकशीसाठी पोलीस कोठडीची मागणी केली. पोलिसांच्या या मागणीनंतर कल्याण न्यायालयाने 26 तारखेपर्यंत अक्षय शिंदे याला पोलीस कोठडी सुनावली आहे.

पालकमंत्री मंगलप्रभात लोढा यांची मोठी घोषणा

दरम्यान, बदलापूरमधील धक्कादायक घटनेनंतर पालकमंत्री मंगलप्रभात लोढा यांनी मोठी घोषणा केली आहे. प्रत्येक शैक्षणिक संस्थेत एक महिला स्वच्छता कर्मचारी नेमा असे आदेश मुंबई उपनगर पालकमंत्री मंगलप्रभात लोढा यांनी दिले आहेत. शैक्षणिक संस्थेत आत्मरक्षणासाठी अभियान सुरु करा, शैक्षणिक संस्थांमधील चालक, वाहक, कँटीन कर्मचारी, सुरक्षा रक्षक यांची पोलीस पडताळणी बंधनकारक करा, महिला पालकांची समिती नेमून प्रत्येक महिन्याला सुरक्षा आढावा घ्या, अशाही सूचना त्यांनी दिले आहेत.