Sai Resort : दापोलीच्या मुरूड येथील साई रिसॉर्ट प्रकरणी ईडीने सदानंद कदम आणि जयराम देशपांडे यांना अटक केली असतानाच, मुंबई हायकोर्टानं ठाकरे गटाचे नेते आणि माजी मंत्री अनिल परब यांना मोठा दिलासा दिला आहे. परब यांच्याविरोधात कुठलीही 'सक्ती'ची कारवाई केली जाऊ नये, असे आदेश हायकोर्टाने ईडीला दिले आहेत.  (Latest Marathi News)

दापोलीमधील मुरूड येथील साई रिसॉर्टशी (Dapoli Sai Resort scam) संबंधित मनी लाँड्रिंग प्रकरणात ईडीकडून (ED) आधी सदानंद कदम आणि त्यानंतर तत्कालीन प्रांताधिकारी जयराम देशपांडे यांना अटक झाल्यानंतर खळबळ उडाली होती.

दुसरीकडे ठाकरे गटाचे नेते अनिल परब यांनी या प्रकरणात मुंबई हायकोर्टात याचिका दाखल केली होती. ईडीने त्यांच्याविरोधात नोंदवलेला ईसीआयआर रद्द करण्याची मागणी या याचिकेद्वारे करण्यात आली होती. त्यावर मंगळवारी तातडीची सुनावणी घेण्यात यावी, अशीही मागणी करण्यात आली होती.

मुंबई हायकोर्टात आज, मंगळवारी परब यांच्या याचिकेवर सुनावणी झाली. ईडीने सोमवारपर्यंत अनिल परब यांच्याविरोधात कोणतीही सक्तीची कारवाई करू नये, असे आदेश हायकोर्टाने दिले आहेत.

सदानंद कदमांनंतर जयराम देशपांडेंनाही अटक

दापोलीतील साई रिसॉर्टशी संबंधित मनी लाँडरिंग प्रकरणात ईडीने कारवाई करत परब यांचे निकटवर्तीय सदानंद कदम आणि त्यानंतर मंगळवारी तत्कालीन प्रांताधिकारी जयराम देशपांडे यांना अटक केली.

साई रिसॉर्टच्या कामासाठी बेकायदेशीर परवानगी दिल्याचा ठपका त्यांच्यावर ठेवण्यात आल्याचे सांगण्यात येत आहे. त्यांना कोर्टात हजर करण्यात येणार असल्याची माहिती आहे.

Edited By - Nandkumar Joshi