संजय गडदे,साम टीव्ही

मुंबईत महापालिका निवडणुकीला गालबोट लागलं आहे. मुंबईत शिंदे गटाच्या उमेदवारावर चाकू हल्ल्याची घटना ताजी असताना मालाडमध्येही एका अपक्ष उमेदवारावर हल्ला झाल्याची घटना उजेडात आली आहे. प्रचारादरम्यान केलेल्या हल्ल्याने घटनास्थळी एकच खळबळ उडाल्याचं पाहायला मिळालं. या प्रकरणी पोलिसांनी कारवाईच्या सूचना दिल्या आहेत.

मिळालेल्या माहितीनुसार, मालाडच्या वॉर्ड क्रमांक ३४ मधील उपक्ष उमेदवार अरबाज अस्लम शेख यांच्यावर मंगळवारी हल्ला झाल्याची घटना घडली. अरबाज आणि त्यांचं समर्थक रॅलीच्या माध्यमातून प्रचार करताना अज्ञातांनी दगडफेक केली. मालाडच्या ५ नंबर मार्केट परिसरात अज्ञातांकडून दगडफेक झाली.

अज्ञातांनी केलेल्या हल्ल्यात अपक्ष उमेदवार अरबाज शेख यांच्या डोक्यात दुखापत झाली. त्यांचे डोके फुटले. हल्ल्यात जखमी झाल्यानंतर उमेदवार अरबाज यांना तातडीने जवळील रुग्णालयात दाखल करण्यात आले. या घटनेनंतर उमेदवाराच्या मोठ्या भावाने मालवणी पोलिसांसी संपर्क साधला.

मालवणीच्या वरिष्ठ पोलीस निरीक्षकांनी तातडीने तक्रार दाखल करण्याच्या सूचना दिल्या. या हल्ल्याप्रकरणी एफआयआर नोंदवण्याची प्रक्रिया सुरू आहे. यासाठी अरबाज अस्लम शेख आणि शारूक अस्लम शेख मालवणी पोलीस ठाण्यात पोहोचले. या घटनेने निवडणूक प्रचारादरम्यान सुरक्षेचा प्रश्न पुन्हा निर्माण झाला आहे.

तत्पूर्वी, वांद्रे येथे शिंदे गटाच्या उमेदवारावर मंगळवारी चाकू हल्ला झाल्याची घटना घडली. शिंदे गटाचे उमेदवार हाजी सालीन कुरेशी यांच्यावर हल्ला झाला. अज्ञात व्यक्तीने कुरेशी यांच्या पोटात चाकू भोसकला. या घटनेत कुरेशी गंभीर जखमी झाले असून त्यांना तातडीने रुग्णालयात दाखल करण्यात आले. त्यांच्यावर आता रुग्णालयात उपचार सुरू आहेत.