Shivsena Latest News: ठाकरे गटाने केंद्रीय निवडणूक आयोगाला सादर केलेली अडीच लाख प्रतिज्ञापत्रं बाद केल्याची बातमी काल, बुधवारी अनेक प्रसारमाध्यमांमध्ये आणि सोशल मीडियावर पसरली होती. याप्रकरणी आता शिवसेनेच्या ठाकरे गटाचे खासदार अरविंद सावंत यांनी ठाकरे गटाची बाजू स्पष्ट केली आहे. तसेच ही बातमी खोटी असल्याचंही सावतं म्हणाले आहेत. (Arvind Sawant Latest News)

काल, बुधवारी सोशल मीडियावर ही बातमी पसरली होती, मात्र ही बातमी खोटी असल्याचा दावा खासदार अरविंद सावंत (MP Arvind Sawant) यांनी केला आहे. तसेच ही बातमी खोटी असून भाजपने ही बातमी मुद्दाम पेरली आहे असा आरोपही त्यांनी केला आहे.

आपली शिवसेना हीच खरी सेना असल्याचं सिद्ध करण्यासाठी शिंदे आणि ठाकरे गटाकडून पक्षाच्या लाखो सदस्यांमार्फत पाठिंब्याची प्रतिज्ञापत्रे जमा केली जात आहेत. ही प्रतिज्ञापत्रे जमा करण्यात ठाकरे गटाने आघाडी घेतली असली तरी ती निवडणूक आयोगाने ठरवून दिलेल्या फॉरमॅटमध्ये ही प्रतिज्ञापत्र नसल्याने तब्बल अडीच लाख अर्ज निरुपयोगी ठरल्याची बातमी समोर आली होती. मात्र ही बातमी खोटी (Fake News) असल्याचं खासदार अरविंद सावंत म्हणाले आहेत. तसेच याबाबत आदित्य ठाकरेंनीही ही बातमी खोटी असल्याचं म्हटलं आहे.

यावेळी खासदार अरविंद सावंत यांनी भाजपवर निशाणा साधला आहे. "प्रतिज्ञापत्रांच्या संदर्भातील बातमी ऐकली. खरे तर निवडणूक आयोगाचे कार्यालय ४ दिवस बंद आहे. प्रतिज्ञापत्र तपासणी व्हायची आहे. कुठलीतरी बातमी घेऊन वाहिन्या वृत्त दाखवतात. नॅरेटिव्ह सेट करण्याचा प्रयत्न सुरू आहे. भ्रम पसरविण्याचा भाजपचा अश्लाघ्य प्रयत्न..!" असं अरविदं सावंत यांनी आपल्या ट्विटमधून म्हटलं आहे.