गोपाल मोटघरे,साम टीव्ही

पुणे: पिंपरी चिंचवड महापालिकेचे आयुक्त शेखर सिंह यांनी आज 2025-26 या आर्थिक वर्षाचा 6 हजार 256 कोटीचं अर्थसंकल्प सादर केला आहे.तर केंद्र सरकार मार्फत अनेक योजनांसह 9 हजार 675 कोटी रुपयांचा अर्थसंकल्प सादर केला आहे. या अर्थसंकल्पात आरोग्य, वैद्यकीय, शिक्षण, पर्यावरण अशा पायाभूत सुविधांवर भर दिला आहे.तर पाणी पुरवठा सुरळीत करण्यावर देखील विशेष लक्ष दिले आहे.

इतर विभागाच्या तुलनेत भोसरीला झुकत माप!

भाजपच्या चारही आमदारांनी स्वतःच्या मतदारसंघाला अधिक निधी मिळावा यासाठी प्रशासनावर दबाव टाकल्याच्या चर्चा रंगल्या होत्या. प्रत्यक्षात अर्थसंकल्प पाहता भोसरी विधानसभेला अधिक निधी मिळाल्याचं स्पष्ट होत आहे. तर पिंपरी आणि चिंचवडसाठी निधी तुलनेने कमी वाटप झाल्याची चर्चा आहे. आयुक्त शेखर सिंह यांनी या मुद्यावर भाष्य करताना सांगितले की शहराच्या विकासाच्या गरजा पाहून निधींचे वाटप केले आहे. कोणत्याही विशिष्ट भागाला झुकतं माप देण्याचा हेतू नाही. असे ते म्हणाले.

अर्थसंकल्पातील महत्त्वाच्या तरतुदी

- विकासकामांसाठी 1962.72 कोटी रकमेची तरतूद

- शहरातील आठ क्षेत्रीय कार्यालयासाठी 128 कोटींची तरतूद

- पाणी पुरवठा सुरळीत करण्याच्या हेतूने 300 कोटींची तरतूद

- स्थापत्य विशेष योजनांसाठी 753.56 कोटींची तरतूद

- शहरी गरिबांसाठी 1898 कोटींची तरतूद

- पीएमपीएमएल (बस) साठी 417 कोटींची तरतूद

- पर्यावरण संतुलित ठेवण्यासाठी 160 कोटींची तरतूद

- भूसंपदानासाठी 100 कोटींची तरतूद

- जेंडर बजेट - महिलांच्या विविध योजनांसाठी 83 कोटींची तरतूद

- दिव्यांग कल्याणकारी योजनांसाठी 62 कोटींची तरतूद

- अमृत 2.0 योजनेसाठी 55.48 कोटींची तरतूद

- स्मार्ट सिटीसाठी 50 कोटींची तरतूद

- अतिक्रमण निर्मूलन व्यवस्थेसाठी 10 कोटींची तरतूद