पुणे: पक्षाचा व्हीप डावलल्यानं भोर पंचायत समितीच्या सभापती सह दोन सदस्यांचे पद रद्द करण्यात आले आहे. स्थानिक स्वराज्य संस्थांमध्ये पाहिल्यांदाज पक्षाचे व्हीप डावल्याने कारवाई केली गेली आहे. सभापती दमयंती जाधव तसेच पंचायत समिती सदस्य श्रीधर रघुनाथ किंद्रे व मंगल सोपान बोडके या राष्ट्रवादी काँग्रेसच्या तीन सदस्यांचे सदस्यत्व जिल्हाधिकाऱ्यांनी रद्द केले आहे.

जिल्हाधिकारी डॉ. राजेश देशमुख यांनी सदस्यत्व रद्द केल्याचे आदेश काढले आहेत. पंचायत समितीच्या सभापती निवडीवेळी पक्षाने बजावलेल्या व्हीपचे पालन न केल्याचा ठपका ठेवण्यात आला होता. राष्ट्रवादीचे जिल्हाध्यक्ष प्रदीप गारटकर यांनी याबाबत जिल्हाधिकाऱ्यांकडे अपील केले होते. भोर पंचायत समितीमध्ये राष्ट्रवादी काँग्रेस ४ आणि शिवसेना व काँग्रेस पक्षाचा प्रत्येकी १ सदस्य आहे.

दरम्यान जिल्हाधिकाऱ्यांनी सभापतींसह अन्य दोन सदस्यांचे सदस्यत्व रद्द करण्याचे आदेश दिल्याने राजकीय वर्तुळात चर्चांना उधान आले आहे. जिल्हाधिकारी डॅा. राजेश देशमुख यांनी मंगळवारी (दि. १४ ) या बाबत आदेश दिले असल्याची माहिती जिल्हाध्यक्ष प्रदीप गारटकर यांनी पत्रकारांशी बोलताना दिली आहे. भोर पंचायत समितीचा कारभार आता राष्ट्रवादी काँग्रेसचे उपसभापती लहूनाना शेलार हेच पाहतील असे ही त्यांनी सांगितले.

Edited By: Pravin Dhamale