फय्याज शेख, भिवंडी | साम टीव्ही

भिवंडी महापालिका निवडणुकीच्या २४ वर्षांच्या इतिहासात पहिल्यांदाच एखाद्या पक्षाचा उमेदवार बिनविरोध निवडून आला आहे. भाजपने या महापालिकेत विजयाचं खातं उघडलं आहे. उमेदवार सुमित पुरुषोत्तम पाटील हे बिनविरोध निवडून आले आहेत. सुमित हे भाजप नेते आणि माजी केंद्रीय राज्यमंत्री कपिल पाटील यांचे पुतणे आहेत. विशेष म्हणजे, भाजपनं खातं उघडताच थेट मुख्यमंत्री देवेंद्र फडणवीस यांचा फोन खणखणला. त्यांनी सुमित आणि कपिल पाटील यांचं अभिनंदन केलं.

राज्यभरात महापालिका निवडणुकांची रणधुमाळी सुरू आहे. २९ महापालिकांच्या निवडणुकांसाठी तीस हजारांहून उमेदवारांनी अर्ज दाखल केले आहेत. सर्वाधिक पुणे महापालिकेच्या निवडणुकीसाठी उमेदवारी अर्ज दाखल झाले आहेत. त्यापाठोपाठ मुंबई आणि नाशिकचा क्रमांक लागतो. उमेदवारी अर्ज दाखल केल्यानंतर अनेक ठिकाणी बंडखोरीला ऊत आला आहे. त्याचवेळी काही महापालिकांमध्ये मतदानाआधीच उमेदवार बिनविरोध निवडून आले आहेत. राज्यात सर्वाधिक भाजपचे उमेदवार आतापर्यंत बिनविरोध निवडून आले आहेत. निवडणूक आयोगाकडून अद्याप याबाबत अधिकृत घोषणा व्हायची आहे.

भिवंडी महापालिकेच्या निवडणुकीतही भाजपने विजयी खाते उघडले आहे. प्रभाग क्रमांक १७ ब मधील भाजप उमेदवार आणि माजी केंद्रीय राज्यमंत्री कपिल पाटील यांचे पुतणे सुमित पुरुषोत्तम पाटील हे बिनविरोध निवडून आले आहेत. मान सरोवर येथील निवासस्थानी विजय जल्लोष साजरा करीत असतानाच मुख्यमंत्री देवेंद्र फडणवीस यांनी फोन करून सुमित पाटील आणि माजी केंद्रीय राज्यमंत्री कपिल पाटील यांचं अभिनंदन केलं. हा विजय भिवंडीतील विजयाची नांदी ठरेल, अशा शुभेच्छाही त्यांनी दिल्या. विशेष म्हणजे २४ वर्षांच्या कालावधीत झालेल्या चार निवडणुकांमध्ये कोणीही उमेदवार बिनविरोध निवडून आला नव्हता. तो विक्रम आता भाजपचे सुमित पाटील यांनी या निवडणुकीत केला आहे.

देशाचे नेतृत्व करणारे प्रधानमंत्री नरेंद्र मोदी, मुख्यमंत्री देवेंद्र फडणवीस यांच्या नेतृत्वाखाली देशात आणि राज्यात सुरू असलेला विकासाचा रथ कोणी रोखू शकत नाही. या विश्वासाने जनता भाजपकडे बघत आहे. मुख्यमंत्री फडणवीस, भाजप प्रदेशाध्यक्ष रवींद्र चव्हाण यांच्या मार्गदर्शनाखाली पद्मानगर येथील प्रभाग क्रमांक १७ ब मधील प्रतिस्पर्धी उमेदवारांना परिसरासह शहराचा विकास भाजपच्या नेतृत्वाखाली होऊ शकतो हा विश्वास आहे. त्यामुळं त्यांनी मोठ्या मनाने उमेदवारी मागे घेत सुमित पाटील यांना नेतृत्व करण्याची संधी दिली आहे, अशी प्रतिक्रिया कपिल पाटील यांनी दिली. हा विजय भिवंडीत महायुतीच्या माध्यमातून विजयरथ सुरू ठेवणारा असून पालिकेवर महायुतीची सत्ता आणून महापौर महायुतीचाच बसेल, असा विश्वासही त्यांनी व्यक्त केला.