सागर आव्हाड, पुणे प्रतिनिधी

Pune Koregaon Bhima News : कोरेगाव भीमा येथे गेल्या काही दिवसांपासून एक माकडीण, तिचे पिल्लू आणि त्यांच्यासोबत असलेले आणखी एक माकड परिसरात फिरताना दिसत होते. आई, तिचे बाळ आणि त्यांचा एक रक्षक मित्र! ही तिघांची अनोखी जोडी गावकऱ्यांच्या नजरेस पडली होती.

पण रविवारी एका हृदयद्रावक घटनेने ही तिघांची साथ कायमची तुटली. चिमुकल्या पिल्लाचा अपघाती मृत्यू झाला आणि त्याला वाचवण्याच्या प्रयत्नात माकडीणही मृत्यूमुखी पडली. या दोघांच्या मृतदेहाजवळ तिसरे माकड कालपासून शांतपणे, हालचाल न करता बसले आहे. न अश्रू, न शब्द... फक्त शून्यात हरवलेली नजर.

हे दृश्य पाहून अनेकांच्या डोळ्यांत पाणी तरळले. भावना फक्त माणसांपुरत्या मर्यादित असतात, असे कोण म्हणते? या माकडाच्या वागणुकीने माणुसकीला खरेच आरसा दाखवला. वन्यजीवप्रेमींनी घटनास्थळी धाव घेत मृत माकडांचे मृतदेह ताब्यात घेऊन वनविभागाकडे सुपूर्द केले. पण या घटनेने एक गहन प्रश्न उपस्थित केला आहे—आपल्या सभ्य समाजात खरंच संवेदनशीलता शिल्लक आहे का? माकडीण गेली, पिल्लू गेले... पण तिसरे माकड अजूनही तिथेच आहे. कुणासाठी? प्रेमासाठी? आठवणींसाठी? की आपल्याला माणुसकीचा धडा शिकवण्यासाठी...?