>> गिरीश कांबळे

Shirdi Lok Sabha Constituency News: उद्धव ठाकरे लोकसभा निवडणुकांच्या तयारीच्या पार्श्वभूमीवर सर्व 48 जागांचा आढावा घेत आहेत. शिवेसना उद्धव बाळासाहेब ठाकरे गटाकडून लोकसभा मतदारसंघनिहाय बैठकांचा धडाका सुरु आहे.

यातच आता शिर्डी लोकसभा मतदारसंघावरून मातोश्रीवर खडाजंगी सुरु आहे. शिर्डीमध्ये लोकसभा मतदारसंघात उमेदवारी देण्यावरून उद्धव ठाकरेंसमोर पेच निर्माण झाला आहे.

माजी खासदार भाऊसाहेब वाकचौरे विरुद्ध माजी आमदार मंत्री बबनराव घोलप यांच्यात जुंपण्याची शक्यता वर्तवली जात आहे. भाऊसाहेब वाकचौरे यांना उद्धव गटातून उमेदवारी दिली जाऊ शकते, अशी चर्चा सुरु आहे. या चर्चेनंतर माजी मंत्री बबनराव घोलप यांनी मातोश्रीवर धाव घेतल्याचं सूत्रांनी सांगितलं आहे.  (Latest Marathi News)

मंत्री बबनराव घोलप यांनी उद्धव ठाकरे यांची भेट घेऊन वाकचौरेंच्या उमेदवारीला विरोध केल्याचं सूत्रांचं म्हणणं आहे. सूत्रांच्या माहितीनुसार, शिवसेनेतील फुटीनंतर उद्धव ठाकरेंनी पाच वेळा आमदार राहिलेल्या बबनराव घोलप यांना लोकसभेच्या उमेदवारी देण्याचे आश्वासन दिले होते.

घोलप यांना शिर्डी लोकसभा मतदारसंघात संपर्क प्रमुख नेमून नव्या पदाधिकाऱ्यांच्या नियुक्त्या करण्याच्या सूचना उद्धव ठाकरे यांनी दिल्या होत्या. मात्र उद्धव ठाकरे यांनी जुन्या पदाधिकाऱ्यांची बैठक घेऊन वाकचौरे यांच्या उमेदवारीवर चर्चा केली असल्याने बबनराव घोलप अस्वस्थ असल्याचं सूत्रांनी सांगितलं आहे. त्यामुळे आज मातोश्रीवर उद्धव ठाकरे यांची भेट घेऊन घोलप यांनी तीव्र नाराजी व्यक्त केली असल्याचं बोललं जात आहे.