अजय दुधाणे, अंबरनाथ

अंबरनाथमध्ये डंपरने दुचाकीस्वाराला उडवल्याची धक्कादायक घटना घडली आहे. लोकनगरी बायपास रोडवर हा अपघात झाला. हा अपघात इकता भीषण होता की डंपरने दुचाकीला चिरडले पण या अपघातामध्ये दैव बलवत्तर म्हणून दुचाकीस्वार थोडक्यात बचावला आहे. ही संपूर्ण घटना सीसीटीव्हीमध्ये कैद झाली आहे. या अपघाताचा व्हिडीओ व्हायरल होत आहे.

मिळालेल्या माहितीनुसार, अंबरनाथ पूर्वेतील लोकनगरी बायपास रस्त्यावर आज सकाळी साडेदहाच्या सुमारास हा भीषण अपघात झाला. या रस्त्यावर एका मागोमाग एक दोन डंपर डावीकडे वळत असताना एक दुचाकीस्वार अचानक मागच्या डंपरच्या चाकाखाली आला. दुचाकीवरून डंबर गेला. दुचाकीस्वार बाजूला झाल्यामुळे तो थोडक्यात बचावला.

दुचाकीवरून डंपरची दोन्ही चाकं गेल्यामुळे दुचाकीचा अक्षरशः चक्काचूर झाला. मात्र सुदैवाने दुचाकीस्वार यातून सुखरूप बचावला. ही सगळी घटना रस्त्याच्या कडेला लावलेल्या सीसीटीव्ही कॅमेरात कैदी झाली आहे. या घटनेनंतर डंपर मालकाने दुचाकीस्वाराला नुकसान भरपाई दिल्यामुळे पोलिस ठाण्यात कोणतीही तक्रार करण्यात आलेली नाही. पण या घटनेचा थरारक व्हिडीओ पाहून नेटकऱ्यांच्या अंगावर अक्षरश: काटा येत आहे.