Ambernath News : बायको सोडून गेल्यानंतर टोमणे मारणाऱ्या बापाची मुलाने हत्या केल्याचा धक्कादायक प्रकार अंबरनाथ शहरात घडला आहे. बापाकडून मारले जाणारे टोमणे आणि मानसिक त्रास याला वैतागून मुलानं हे टोकाचं पाऊल उचललं आहे. (Ambarnath Latest News)

अंबरनाथच्या (Ambernath) दत्तकुटीर भागात देविदास किसन सूर्यवंशी (६०) हे परिवारासह वास्तव्याला होते. त्यांचा मुलगा प्रकाश सूर्यवंशी हा रिक्षा चालवण्याचं काम करतो. प्रकाश हा विवाहित असून त्याला तीन मुलं आहेत. मात्र त्याची बायको (Wife) काही दिवसांपूर्वी त्याला सोडून निघून गेली.

याच कारणावरून देविदास हे त्यांचा मुलगा प्रकाश याला सतत टोमणे मारत आणि सतत घालून पाडून बोलत होते. बापाकडून होणारा हा मानसिक त्रास प्रकाशला असह्य होत होता. त्यातच रविवारी रात्री प्रकाश हा घरी आल्यानंतर जेवण करण्यासाठी बसला होता.

यावेळी पुन्हा एकदा देविदास यांनी त्याला घालून पाडून बोलायला सुरुवात केली. त्यामुळे संतापलेल्या प्रकाशने लाकडी फळीने देविदास सूर्यवंशी यांना मारहाण केली.

या मारहाणीत देविदास सूर्यवंशी यांचा दुर्दैवी मृत्यू झाला. या घटनेनंतर शिवाजीनगर पोलिसांनी तात्काळ घटनास्थळी धाव घेत देविदास सूर्यवंशी यांचा मृतदेह ताब्यात घेत शवविच्छेदनासाठी पाठवला. तर काही वेळाने प्रकाश याला सुद्धा अंबरनाथ शहरातूनच ताब्यात घेण्यात आलं.

Edited By - Akshay Baisane