अजय दुधाणे - अंबरनाथ

अंबरनाथमधून धक्कादायक बातमी समोर आली आहे. जुना भेंडीपाडा परिसरातील फुकट बस्तीमध्ये एकमेकांना चिडवल्याच्या क्षुल्लक कारणावरून दोन अल्पवयीन मित्रांमध्ये झालेल्या वादाने गंभीर वळण घेतलं. वादाचं रूपांतर हाणामारीत झाल्यानंतर १४ वर्षीय मुलाने आपल्या १६ वर्षीय मित्राच्या डोक्यात बांबूच्या काठीने जोरदार हल्ला केला. या हल्ल्यात गंभीर जखमी झालेल्या मुलाचा उपचारादरम्यान मृत्यू झाला. शुक्रवारी दुपारी ही घटना घडली असल्याची माहिती आहे.

मिळालेल्या माहितीनुसार, मृत मुलाचे नाव शोएब सिद्दिकी असं आहे. शोएब हा अंबरनाथ रेल्वे स्थानकाजवळील फुकट बस्ती परिसरात राहत होता. आरोपी मुलगा आणि शोएब हे दोघेही एकमेकांचे मित्र होते. दोघेही नेहमी एकत्र खेळत असल्याची माहिती समोर आली आहे. शुक्रवारी दोघे जुना भेंडीपाडा परिसरातील एका छोट्या मैदानावर खेळत होते. खेळत असताना एकमेकांना चिडवण्यावरून त्यांच्यात वाद झाला. सुरुवातीला शाब्दिक बाचाबाची झाली. मात्र, काही वेळातच हा वाद वाढत गेला आणि दोघांमध्ये हाणामारी सुरू झाली.

याचदरम्यान शोएबच्या मित्राने जवळ असलेल्या बांबूच्या काठीने शोएबच्या डोक्यात जोरदार हल्ला केला. या हल्ल्यात शोएबच्या डोक्याला गंभीर दुखापत झाली आणि मोठ्या प्रमाणात रक्तस्त्राव झाला. तो रक्ताच्या थारोळ्यात जमिनीवर कोसळला. घटनेनंतर आरोपी मुलगा घटनास्थळावरून पळून गेला. जखमी शोएबला तातडीने उपचारासाठी उल्हासनगरच्या मध्यवर्ती रुग्णालयात दाखल करण्यात आलं. मात्र, डॉक्टरांनी तपासल्यानंतर त्याला मृत घोषित केलं.

घटनेची माहिती मिळताच अंबरनाथ पश्चिम पोलिसांनी घटनास्थळी धाव घेत पंचनामा केला. पोलिसांनी संबंधित १४ वर्षीय मुलाला ताब्यात घेत त्याच्याविरोधात गुन्हा दाखल केला आहे. आरोपी अल्पवयीन असल्याने त्याला बाल न्यायालयासमोर हजर करण्यात येणार असून, त्यानंतर बालसुधारगृहात रवानगी केली जाणार असल्याची माहिती पोलिसांनी दिली आहे. क्षुल्लक कारणावरून झालेल्या वादाचा इतका गंभीर परिणाम झाल्याने परिसरात हळहळ व्यक्त होत आहे.