भरत मोहोळकर, साम टीव्ही

नववर्षाच्या पहिल्याच दिवशी पवार कुटुंब एकत्र येण्याच्या चर्चांनी जोर धरलाय. त्याला कारण ठरलंय अजित पवारांच्या आई आशा पवार यांनी विठूरायाला घातलेलं साकडं... पवार कुटुंबातील वाद मिटून पवार कुटुंब एकत्र यावं, असं साकडंच अजित पवारांच्या आईने विठुरायाला घातलंय.

दुसरीकडे अजित पवारांच्या राष्ट्रवादीचे मंत्री नरहरी झिरवळ यांनीही पवार कुटुंब एकत्र येण्याविषयी आशावाद व्यक्त केलाय...तर रामदास आठवलेंनीही पवारांना एनडीएत येण्यासाठी साद घातलीय...

राष्ट्रवादीच्या फुटीनंतर पवार कुटुंबातही फूट पडल्याचं दिसून आलं..लोकसभा आणि विधानसभेतही पवार कुटुंबात संघर्ष दिसून आला. त्यानंतर पवार कुटुंबाचा पारंपरिक दिवाळी पाडवाही वेगवेगळा साजरा झाला...त्यामुळे पवार कुटुंबात कटुता निर्माण झाल्याची चर्चा रंगलीय.. मात्र विधानसभा निवडणुकीनंतर पवार कुटुंबातील महिलांनी कुटुंब एकत्र येण्यासाठी पुढाकार घेतलाय.

पवार कुटुंब एकत्र येण्याबाबत पवार कुटुंबातील महिलांनी पुढाकार घेतल्याने त्याला राजकीय मोठा प्रतिसाद मिळतोय.. त्यामुळे पवार कुटुंब एकत्र येण्यासाठी अजित पवारांच्या आईने विठ्ठलाला घातलेलं साकडं विठुराया ऐकणार का? आणि पवार कुटुंब एकत्र येणार का? याकडे राज्याचं लक्ष लागलंय.. मात्र पवार कुटुंब एकत्र आल्यास राज्यात मोठी उलथापालथ होण्याची शक्यता नाकारता येत नाही.