गोपाळ मोटघरे, साम टीव्ही, प्रतिनिधी

Maharashtra : राज्याचे उपमुख्यमंत्री आणि पुण्याचे पालकमंत्री अजित पवार सध्या पिंपरी-चिंचवडच्या दौऱ्यावर आहेत. कालपासून पिंपरी-चिंचवड आणि आसपासच्या परिसरात त्यांचा दौरा सुरु आहे. आगामी स्थानिक संस्थांच्या निवडणुकीच्या पार्श्वभूमीवर अजित पवार मोर्चेबांधणी करत असल्याचे म्हटले जात आहे. या दौऱ्यादरम्यान त्यांनी केलेल्या एका वक्तव्याने सर्वांचे लक्ष वेधले आहे.

'पिंपरी-चिंचवड शहरातील विकास काम खूप मोठं आहे. शहरातील विकास काम करण्यासाठीची क्षमता आणि ताकद आमच्यामध्ये आहे. त्यामुळे आगामी महानगरपालिका निवडणुकीत मी दिलेल्या उमेदवाराच्या पाठिशी तुम्ही उभे राहा आणि त्यांना निवडून द्या', असे आवाहन उपमुख्यमंत्री अजित पवार यांनी पिंपरी -चिंचवड शहरातील मतदारांना केला आहे.

'पिंपरी-चिंचवड शहराच्या विकासाठी राज्य आणि केंद्र सरकारची मदत कशी घ्यायची हे आम्हाला चांगलच माहीत आहे. तुम्ही मी दिलेल्या उमेदवाराला निवडून द्या', असे म्हणत अजित पवार यांनी एका प्रकारे पिंपरी-चिंचवड शहरात स्वबळावर निवडणूक लढण्याचा इशारा महायुतीतील घटक पक्षांना दिला आहे अशी चर्चा रंगली आहे.

अजित पवार यांचा पिंपरी-चिंचवड शहर हा बालेकिल्ला समजला जातो. आगामी महानगरपालिका निवडणुका डोळ्यासमोर ठेवून अजित पवार यांनी दोन दिवसांपासून पिंपरी-चिंचवड शहरात भेटीगाठींचा धडाका लावला आहे. यामुळे अजित पवार हे महायुतीत असताना देखील पिंपरी-चिंचवड शहरात स्वबळावर निवडणूक लढणार का? असा प्रश्न उपस्थित केला जात आहे.