Maval Latest News : मनात जिद्द असेल तर सर्वकाही शक्य आहे असं म्हटलं जातं. याचं ताजं पुणे जिल्ह्यातील मावळमध्ये (Maval) पाहायला मिळालं आहे. मावळमधील आरती म्हाळसकर या महिलेनं अतिशय प्रतिकुल परिस्थितीत शिक्षण घेतलं आणि राज्य उत्पादन शुल्क विभागात उपनिरीक्षक पदापर्यंत मजल मारली आहे. त्यामुळे वडगाव मावळातील पंचक्रोशीत त्यांचं सर्वत्र कौतुक होत आहे. (Pune Latest News)

आरती म्हाळसकर या मूळच्या कोकणातल्या. त्यांच्या घरची परिस्थितीही बेताची होती. हातावर पोट असलेल्या आईने आरती यांना मोठ्या कष्टाने दहावीपर्यंत शिकवलं. पुढील शिक्षण घेत असताना आरती यांना अनेक अडचणींना सामोरं जावं लागलं. मात्र शिक्षणाची जिद्द असलेल्या आरती यांना पुढे मुंबईला शिक्षण घेण्यासाठी त्यांच्या आईनं आपलं मंगळसूत्र देखील विकलं. |

आरती शिक्षण घेत असताना त्यांनी अनेक ठिकाणी छोटी-मोठी नोकरी केली. त्यात त्यांनी डिग्रीपर्यंत शिक्षण पूर्ण केलं. यादरम्यान आईच्या इच्छेनुसार त्यांनी अर्जुन म्हाळसकर यांच्यासोबत विवाह करत संसार थाटला. अर्जुन यांना आरती यांच्यात शिक्षणाची जिद्द आणि चिकाटी दिसल्याने त्यांच्या पत्नीला प्रोत्साहन दिलं आणि महाराष्ट्र लोकसेवा आयोगाची परीक्षा देण्यात सांगितलं.

घर-संसार आणि जबाबदारी सांभाळत आरती या रोज बारा-तेरा तास अभ्यास करायच्या. बघता-बघता आरती यांनी केलेल्या मेहनतीला यश आलं. महाराष्ट्र लोकसेवा आयोगाने घेतलेल्या परीक्षेचा निकाल जाहीर झाला आणि यात आरती उत्तीर्ण झाल्या. आता राज्य उत्पादन शुल्क विभागात उपनिरीक्षक पदावर (PSI) त्यांची निवड झाली आहे. काहीतरी करुन दाखवण्याची जिद्द, मेहनत आणि आईसह पतीची मिळालेली साथ यामुळेच आरती आज पीएसआय झाल्या आहेत.

Edited By - Akshay Baisane