संजय गडदे

Mumbai News: गेल्या काही दिवसांपासून मुंबईत चोरीच्या घटनांमध्ये वाढ झाली आहे. अशाच एका चोरीचा उलगडा मुंबईच्या समता नगर पोलिसांनी केला आहे. घरात कोणी नसताना केअर टेकर महिलेने बेडरूम मधील दागिन्यांची चोरी केली. या दागिन्यांची किंमत साडे तेरा लाख इतकी होती. या प्रकरणी समता नगर पोलीसांनी केअर टेकर महिलेला ताब्यात घेऊन तिच्याकडून 90 टक्के मुद्देमाल हस्तगत केला आहे. (Latest Marathi News)

पोलिसांनी दिलेल्या माहितीनुसार, कांदिवली पूर्वेकडील भूमी आर्किड इमारतीत राहणाऱ्या रेवर दाम्पत्याची देखरेखी साठी एका 26 वर्षीय महिलेची नेमणूक करण्यात आली होती. रेवर दाम्पत्याची मुले आणि नातवंडे मुंबई बाहेर गेल्यानंतर संधी साधली.

आरोपी महिलेने घरात ठेवलेल्या दागिन्यांवर हात मारून गावात लग्नाच्या बहाण्याने रजा घेऊन गायब झाली. काही दिवसांनी फिर्यादीच्या कुटुंबीयांनी कपाट उघडले असता दागिने गायब होते. फिर्यादीच्या तक्रारीवरून समता नगर पोलिसांनी फिर्याद नोंदवून तपास सुरू केला.

पोलिसांच्या तपासात हा चोर दुसरा कोणी नसून घरामध्ये ठेवलेली २६ वर्षीय केअरटेकर महिला असल्याचे निष्पन्न झाले. दागिने चोरलेल्या आरोपी महिलेला बोरिवली येथून अटक केली आहे.

तपासा दरम्यान महिलेने चोरीचा गुन्हा कबूल केला असून तिच्याकडून साडेतेरा लाख रुपये किमतीच्या 265 ग्रॅम सोन्यापैकी 12 लाख 50 हजारांचे 250 ग्रॅम दागिने जप्त करण्यात आले आहेत.