मुंबई : येथे कोरोनाच्या दैनंदिन रुग्णसंख्येत (Mumbai corona update) होणारी वाढ चौथ्या लाटेला आमंत्रण करणारी असल्याने नागरिकांची चिंता वाढली आहे. गेल्या काही दिवसांपासून नव्या कोरोना रुग्णसंख्येत (corona new patients) मोठी वाढ होत आहे. दिवसेंदिवस वाढणाऱ्या कोरोनाच्या रुग्णसंख्येमुळं नागरिकांचे आरोग्य धोक्यात आलं आहे. आजही मुंबईतील कोरोनाच्या रुग्णसंख्येत लक्षणीय वाढ झाली आहे.

मुंबईतील नव्या कोरोना रुग्णसंख्येने दोन हजारांचा टप्पा पार केल्याने मुंबईकरांच्या चिंतेत भर पडली आहे. मुंबईत आज दिवसभरात कोरोनाच्या नव्या २३६६ रुग्णांचं निदान झालं आहे. त्यामुळे मुंबईतील आजपर्यंतचा कोरोना रुग्णांचा आकडा १०८७३२६ वर पोहोचला आहे. मिळालेल्या माहितीनुसार, मु्ंबईत आज दिवसभरात कोरोनाचे २३६६ नवे रुग्ण सापडले आहेत. तर मुंबईत आज दोन रुग्णांचा मृत्यू (corona death) झाल्याने कोराना मृतांची संख्या १९५७८ वर पोहोचली आहे.

मुंबईत १३००५ एवढे सक्रिय रुग्ण आहेत. तर कोरोनातून बरे झालेल्या रुग्णांची एकूण संख्या १०५५६६५ वर गेली आहे. तसेच दिवसभरात १७०० कोरोना रुग्ण बरे होऊन घरी परतले आहेत. त्यामुळे कोरोनातून बरे झालेल्या रुग्णांचा दर ९७ टक्के एवढा झाला आहे. तर कोरोना रुग्ण दुपटीचा दर ४१९ दिवसांवर पोहोचला आहे.

Edited By - Naresh Shende