दिलीप कांबळे, लोणावळा

मुंबई-पुणे एक्स्प्रेस वेवर भीषण अपघात झाल्याची घटना समोर आली आहे. मुंबई-पुणे एक्स्प्रेस वेच्या मळवली गावाच्या हद्दीमध्ये पहाटेच्या सुमारास हा अपाघात झाला. प्रवासी बसला अज्ञात वाहनाने जोरदार धडक दिली. या अपघातामध्ये १५ प्रवासी गंभीर जखमी झाले आहेत. तर १० प्रवासी किरकोळ जखमी झाले आहेत.

अपघाताची माहिती मिळताच पोलिसांनी घटनास्थळी धाव घेतली. जखमींना तात्काळ सोमाटणे फाटा येथील पवना हॉस्पिटलमध्ये दाखल करण्यात आले आहे. जखमींमधील अनेकांची प्रकृती चिंताजनक आहे. अपघातग्रस्त बस पुण्यावरून मुंबईच्या दिशेने जात होती. त्याचवेळी एका अज्ञात वाहनाने बसला धक दिली. अपघातामध्ये बसच्या पुढच्या भागाचा चक्काचूर झाला आहे.

बसमधील प्रवासी साखर झोपेमध्ये असताना हा भीषण अपघात झाला. ही धडक इतक्या जोरात होती की या अपघातामध्ये बसमधील सर्वच प्रवास जखमी झाले. यामधील १५ जण गंभीर तर १० जण किरकोळ जखमी आहेत. या अपघातामध्ये मुंबई-पुणे एक्स्प्रेस वेवरील मुंबई लेनवरील वाहतूक विस्कळीत झाली होती. पोलिसांनी अपघातग्रस्त बस बाजूला काढून वाहतूक सुरळीत केली.