वाशीम : वाशीममधून धक्कादायक प्रकार समोर आला आहे. घरात मुलगी एकटी असल्याचं पाहून घरात घुसून मुली सोबत सेल्फी काढत लग्नाची मागणी करणाऱ्या टवाळखोराच्या त्रासाला कंटाळून एका अल्पवयीन मुलीने विष प्राशन करून आत्महत्येचा प्रयत्न केला आहे. यात या अल्पवयीन मुलीचा उपचारा दरम्यान दुर्दैवी मृत्यू झाल्याची घटना वाशिमच्या शिरपूर पोलीस स्टेशन अंतर्गत येणाऱ्या एका गावात घडली आहे.

वाशीम येथील शिरपूर पोलीस स्टेशन हद्दीत येणाऱ्या गावात संतापजनक प्रकार घडला आहे. घरात एकटी मुलगी असल्याचा फायदा घेऊन एका तरुणाने घरात घुसखोरी करून तरुणीसोबत जबरदस्ती करून सेल्फी काढण्याचा आग्रह करत लग्नाची मागणी केली. या जाचाला कंटाळून अल्पवयीन मुलीने विष प्राशन करून आत्महत्येचा प्रयत्न केला आहे.

नातेवाईकांनी पीडित मुलीला उपचारासाठी दवाखान्यात दाखल केले असता उपचारादरम्यान तिचा मृत्यू झाला आहे. या प्रकरणात अभिषेक देशमुख या टवाळखोर युवकावर शिरपूर पोलीस स्टेशन मध्ये विविध कलमाअंतर्गत गुन्हा दाखल करण्यात आला आहे. हा युवक मागील पंधरा दिवसापासून या मुलीला सतत त्रास देत होता तसेच परिवारातील सदस्यांना जीवे मारण्याची धमकी सुद्धा देत होता.

या घटने नंतर आरोपी फरार झाला असून, शिरपूर पोलीस आरोपीचा शोध घेत आहेत. दरम्यान घडलेल्या घटनेमुळे वाशिम जिल्ह्यात मोठी खळबळ उडाली आहे. याप्रकरणी नातेवाईकांनी आरोपीला तात्काळ अटक करून न्याय देण्याची मागणी केली आहे, अन्यथा आंदोलनाचा मार्ग स्वीकारू अशी भूमिका पीडितेच्या परिवाराने व्यक्त केली आहे.