वरळी हिट अँड रन प्रकरणात मोठी अपडेट समोर आलीय. या अपघात प्रकरणी वरळी पोलिसांनी शिंदे गटाचे उपनेते राजेश शहा आणि राजेंद्रसिंह बिडावत यांना अटक करण्यात आलीय. राजेश शहा आरोपी मिहीर शहा यांचे वडील आहेत. दरम्यान मिहीर हा अपघातप्रकरणातील मुख्य आरोपी आहे. तो अद्याप फरार आहे. या प्रकरणात कार चालक राजेंद्रसिंह बिडावतसह राजेश शहा यांना अटक करण्यात आलीय. राजेंद्रसिंह हा अपघातावेळी कारमध्ये होता.

दरम्यान वरळी पोलिसांनी या दोघांची दिवसभर चौकशी केली, त्यानंतर यांना अटक करण्यात आलीय. आरोपी मिहीर शहाला पळून जाण्यासाठी या दोघांनी मदत केल्याचा आरोप पोलिसांनी केलाय. तसेच या अपघात प्रकरणातील पुरावे नष्ट केल्याचा संशय पोलिसांना असल्याची माहिती सूत्रांनी दिलीय.

वरळी पोलिसांनी ही कारवाई करण्याआधी मुख्यमंत्री एकनाथ शिंदे यांनी माध्यम प्रतिनिधींशी बोलतांना सांगितलं की, या प्रकरणातील दोषींवर कायदेशीररित्या कारवाई केली जाईल. कोणालाच वाचवलं जाणार नाही, अशी ग्वाही मुख्यमंत्र्यांनी दिली होती.