नाशिक जिल्ह्यात भोंदूबाबा अशोक खरातनं महिलांचं लैंगिक शोषण केलं. त्याचे नवनवीन काळे कारनामे समोर येत असल्याने महाराष्ट्र हादरला आहे. या घटनेचे संतप्त पडसाद खेडोपाडीही उपटतायेत. धुळे जिल्ह्यात निमगुळ गावच्या महिलांनी तर भोंदू बाबांना गावबंदी केली आहे. कुठल्याही प्रकारच्या भोंदूला गावामध्ये थारा मिळणार नसल्याचा मोठा निर्णय महिलांनी घेतलाय.

राज्यात भोंदू बाबांकडून महिलांना संमोहीत करून लुटलं जात असल्याचं लक्षात आल्यानंतर आता जनजागृती होत आहे. अंधश्रद्धा निर्मूलन समितीनेही पुढाकार घेऊन लोकांचं प्रबोधन सुरु केलं आहे. बुवाबाजीच्या नावाखाली फसवणूक करणाऱ्यांविरोधात नागरिक सतर्क झालेत. पुणे जिल्यातील खेड तालुक्यात एका महिलेची पाच हजार रुपयांची फसवणूक करणाऱ्या भोंदूला गावक-यांनी चोप देऊन पळवून लावलं. दुसरीकडे रायगडच्या खालापूरमध्येही 'अब्दुल रशीद उर्फ बाबाजान' या भोंदूबाबाने महिलेचे शोषण केल्याची तक्रार दाखल झाल्याने त्याला अटक झाली आहे. त्यामुळे गावागावात महिलांची अशी एकी आणि जनजागृती झाली तर भोंदूगिरीला नक्कीच चाप बसणार आहे.