बुलडाणा : महिला दिनाच्या आदल्या दिवशीच एका विवाहितेवर दोन नराधमांनी बळजबरीने बलात्कार केल्याची धक्कादायक घटना घडली आहे. या संदर्भात बुलडाणा ग्रामीण पोलीस ठाण्यात महिलेने दिलेल्या तक्रारीवरून अज्ञात आरोपीविरुद्ध गुन्हा दाखल करण्यात आला आहे.

या घटनेमुळे पुन्हा एकदा महिला व मुलींच्या सुरक्षिततेचा प्रश्न ऐरणीवर आला आहे. बुलडाणा (Buldhana) येथील एक दांम्पत्य 6 मार्च रोजी धाड येथे जात असताना रात्री अकरा वाजताच्या सुमारास चिखला परिसरात दोन अज्ञात आरोपींनी त्यांची मोटरसायकल अडवून पतीला मारहाण करत जीवे मारण्याची धमकी देत, या महिलेवर दोघांनी आळीपाळीने बलात्कार केल्याची तक्रार फिर्यादी महिलेने 7 मार्च रोजी दुपारी बुलडाणा ग्रामीण पोलिस ठाण्यात दिली.

या तक्रारीवरून अज्ञात दोन आरोपींविरुद्ध 376 सह विविध कलमान्वये गुन्हे दाखल केले आहे. पोलिसांनी याप्रकरणी आरोपीला शोधण्यासाठी पथके रवाना केली असून, अधिक तपास एपीआय सदानंद सोनकांबळे करत आहेत.

Edited By - Jagdish Patil