Maharashtra Rain Updates : आधीच शेतमालाला मिळणारा कवडीमोल भाव, त्यातच कापूस घरात पडून. अशा विविध संकटाला तोंड देणाऱ्या बळीराजावर आणखी एक संकट ओढावलं. ऐन रब्बी हंगामातील पिके काढणीस आली असताना, अवकाळी पाऊसह गारपीटीचा तडाखा बसला. हातातोंडाशी आलेला घास अवकाळीमुळे हिरावून गेल्याने जगावं तरी कसं असा प्रश्न राज्यातील शेतकऱ्यांना पडला आहे. (Latest Marathi News)

राज्यात अवकाळी पाऊस धुमाकूळ घालणार, असा सतर्कतेचा इशारा हवामान खात्याने  (Weather Forecast)  दिला होता. हवामान खात्याचा अंदाज तंतोतंत खरा ठरवत राज्यात अवकाळी पावसानं जोरदार हजेरी लावली आहे. तर काही ठिकाणी गारपीट देखील झाली आहे. या पावसामुळे राज्यातील शेतकऱ्यांचं प्रचंड नुकसान झालं आहे. दरम्यान, येत्या तीन दिवस राज्यात अशीच परिस्थिती राहिल, असं हवामान खात्याने सांगितलं आहे.

राज्याच्या विविध भागात अचानक झालेल्या बदलामुळे शेतकरी हवालदिल झाला असताना अचानक अवकाळी पाऊस आणि गारपिटीने शेतकऱयांना मोठा फटका बसला आहे. मुंबईतही गेल्या दोन दिवसांपासून ढगाळ वातावरण आहे. समुद्रात निर्माण झालेल्या कमी दाबाच्या पट्टय़ामुळे ही स्थिती निर्माण झाल्याचे हवामान खात्याचे म्हणणे आहे.

राज्यातील अनेक ठिकाणी अवकाळी पावसानं  (Weather Updates)  हजेरी लावली आहे. पुणे जिल्ह्यातही अनेक ठिकाणी पावसाने हजेरी लावली आहे. तसेच पिंपरी चिंचवड, सातारा, धुळे, वर्धा या जिल्ह्यातही पावसाने हजेरी लावली आहे. त्याचबरोबर ठाणे जिल्ह्यातही काही ठिकाणी अवकाळी पावसाने हजेरी लावली आहे.

दुसरीकडे मराठवाड्यासह विदर्भातही अवकाळीने चांगलाच धुमाकूळ घातला. बुलढाणा जिल्ह्यातील खामगाव, संग्रामपूर, जळगाव जामोद, शेगाव, नांदुरा तालुक्यासह जिल्ह्यात वादळी वाऱ्यासह जोरदार अवकाळी झाला आहे. या पावसामुळे शेतकऱ्यांची चिंता वाढली आहे. सध्या रब्बी पिकांच्या काढणीचे दिवस सुरु आहेत. अशातच अवकाळी पावसाने हजेरी लावल्याने शेती पिकांना फटका बसण्याची शक्यता आहे.

राज्यात पुढील 2 ते 3 दिवस गडगडाटासह पाऊस होण्याचा इशारा हवामान खात्याकडून देण्यात आला असून खबरदारी घेण्याचे निर्देश देण्यात आले आहेत. मुंबईसह पुणे, ठाणे, पालघर, नाशिक, कोल्हापूर, नंदूरबार, विदर्भ, मराठवाडा, चंद्रपूर, नागपूर, अमरावती, बुलढाणा, जळगाव, छत्रपती संभाजीनगर आदी भागांत पाऊस होण्याचा इशारा हवामान खात्याकडून देण्यात आला आहे.

Edited By - Saiish Daud