सिद्धेश म्हात्रे

मुंबई: आंतरराष्ट्रीय हिंदू परिषदेचे नेते प्रवीण तोगडिया यांनी पुन्हा एकदा वादग्रस्त विधान केलं आहे. मुस्लिमांनी समजूतदारपणा दाखवून ज्ञानवापी मशिदीचा ताबा सोडावा अन्यथा देशभरात मंदिरे तोडून बांधण्यात आलेल्या तीस हजार मशिदींवर आम्ही दावा ठोकू असा इशारा हिंदू परिषदेचे नेते डॉ. प्रवीण तोगडिया यांनी दिला आहे. वाशीतील एका खाजगी कार्यक्रमानिमित्त डॉ. प्रवीण तोगडिया नवी मुंबईत आले असताना उपस्थितांशी संवाद साधताना त्यांनी ज्ञानवापी मंदिर वादावर आपली भूमिका मांडली.

ज्ञानवापी मशिदीत शिवलिंग सापडले असून ज्ञानवापी मशिदीच्या भिंतीकडे तोंड करून नंदी भगवान विश्वनाथ यांची प्रतीक्षा करत होते. याठिकाणी काशीच्या श्रृंगार गौरीचे मंदिर होते हे देखील स्पष्ट झाले असल्याने ज्ञानवापी मशिदीवर मुस्लिमांनी केलेला दावा मागे घ्यावा. या प्रकरणातील वादात आम्ही सर्व पुरावे देणार असल्याचे देखील त्यांनी उपस्थितांना सांगितले. यासोबतच मनसे अध्यक्ष राज ठाकरे यांनी आता अयोध्या दौरा न करता काशीचा दौरा करावा असे विधान देखील डॉ तोगडिया यांनी व्यक्त केलेय.

Edited By: Pravin Dhamale