मनोज जयस्वाल 

वाशिम : वाशिम शहरातील पाटणी चौकात दोन गटांमध्ये अचानक वाद झाल्याने दोन्ही गट समोरासमोर आले. याच दरम्यान दोन्ही गटांकडून दगडफेक करण्यात आल्याची घटना रात्रीच्या सुमारास घडली. या घटनेनंतर तणाव निर्माण झाला होता. घटनेची माहिती मिळताच पोलीस प्रशासन तात्काळ घटनास्थळी येत नियंत्रण मिळविले. मात्र परिसरात तणावाचे वातावरण पाहण्यास मिळाले. 

वाशिम शहरातील पत्नी चौक परिसरात १२ मे च्या रात्री काही कारणात्सव दोन गटांमध्ये जोरदार राडा झाला. या वादात दोन्ही गटांकडून तुफान दगडफेक करण्यात आली होती. दगडफेकीच्या घटनेनंतर याचे पडसाद शहरातील आजूबाजूच्या परिसरात देखील उमटल्याचे पाहण्यास मिळाले. यात दांडे चौक, गणेशपेठ परिसर, बागवान पुरा या भागात तणावाचे वातावरण निर्माण झालेले होते. 

घरांवर दगडफेक, गाड्यांचे केले नुकसान 

रात्री ११ वाजताच्या सुमारास अचानक तणाव निर्माण झाला. दोन समाजातील समाजकंटकांनी परिसरातील काही घरांवर आणि वाहनांवर दगडफेक केली. यात गाड्यांचे नुकसान देखील झाले आहे. तसेच तीन ते चार नागरिक यात जखमी झाले आहेत. घटनेची माहिती मिळताच पोलिसांनी तात्काळ घटनास्थळी येत परिस्थितीवर नियंत्रण मिळविले. तसेच परिसरात कडक बंदोबस्त लावला होता. 

सहा जणांना घेतले ताब्यात 

वाशिम शहर पोलिसांनी परिस्थितीवर तात्काळ नियंत्रण मिळवत सहा जणांना ताब्यात घेतले आहे. सध्या परिस्थिती पूर्व पदावर आली आहे. तर पोलीस प्रशासनाने नागरिकांना अफवांवर विश्वास न ठेवता शांतता राखण्याचं आवाहन केलं आहे. शहरात तणावपूर्ण शांतता असून कोणतीही अनुचित घटना घडू नये; यासाठी पोलीस सतर्क असल्याची माहिती वाशिम शहर पोलिस निरीक्षक देवेंद्रसिंह ठाकूर यांनी दिली आहे.