मनोज जयस्वाल 

वाशीम : वाशिम जिल्ह्यात पाच सौर ऊर्जा प्रकल्प निर्मितीसाठी राज्य सरकारकडून मान्यता देण्यात आली आहे. या प्रकल्पातून साधारण १७० मेगावॅट वीज निर्मिती होणार असून या प्रकल्प उभारणीसाठी जमीन अधिग्रहण प्रक्रियेला सुरुवात देखील करण्यात आली आहे.

राज्य सरकारने वाशिम (Washim) जिल्ह्यात पाच सौर ऊर्जा प्रकल्प निर्मितीसाठी मान्यता दिली असून त्यातून १७० मेगावॅट वीज निर्मिती होणार आहे. त्यामध्ये वाशिम तालुक्यातील दुधखेडा येथे ६० मेगावॅट, पार्डी टकमोर येथे ३० मेगावॅट, बाभुळगाव आणि सायखेडा येथे २० मेगावॅट तर मंगरूळपिर तालुक्यातील कांझारा येथे ४० मेगावॅट क्षमतेचा (Solar Energy) सौर ऊर्जा प्रकल्प उभारला जाणार आहे. यामुळे महानिर्मितीकडून वीज निर्मिती प्रकल्पावरील लोड कमी होणार आहे. 

हे प्रकल्प उभारणीसाठी जमिनींचे अधिग्रहण करण्यात येत असून यातील काही प्रकल्पांची जमीन अधिग्रहण प्रक्रिया पूर्ण झाली असून दुधखेडा येथील जमिनीला सध्या तार कंपाउंड करण्याचे काम सुरू आहे. तर वाशिमसह इतर तीन जिल्ह्यांमध्ये उभारल्या जाणाऱ्या सौर ऊर्जा प्रकल्पासाठी राज्य सरकारने १४९४ कोटी ४६ लाख रुपयांच्या खर्चाला मान्यता दिली आहे.